Guwahati, Kyllalyngkot:
U Myntri Rangbah jong ka jylla Assam u Himanta Biswa Sarma u la khot ïa ki nongïalam karkhana ba kin kiar na kaba ai kam ïa ki nong Bangladesh kiba wan buhai shnong beaiñ kum ka lad ban ïoh ïa ki nongbylla kiba shim tad dor.
Haba kren ha ka jingïalang bad ki nongthoh khubor hadien ba u la ïakren bad ki nongïalam ba pawkhmat jong ki kompeni, ba kynthup ïa ki nongmihkhmat na ka Tata, ka Adani Group, bad ka Mahindra, u Sarma u la ban jur ïa ka jingdonkam ban weng ïa ki daw tynrai jong ka jingwan buhai shnong beaiñ da kaba khanglad ïa kum kine ki rukom thung kam.
U Sarma u la kdew ba ki nongpyntrei bunsien ki pynsuk ïa ka jingwan ki nongtrei kiba shim tad dor na Bangladesh na ka bynta ban pyndonkam ha ki karkhana.
U la kyntu ïa ki karkhana ban shim ïa ka sienjam kaba skhem bad ban pynduh noh ïa katei ka rukom, kaba pynsahteng ïa ka mat jong ka jingwan buhai shnong beaiñ.
Haba kylli hato kane ka phang ka la ïakren ha ki jingïalang jong u bad ki heh jong ki kompeni, u Sarma u la pynpaw ba ka Assam ka la ïakren ïa kane ka jingeh naduh u snem 1979, kaba ai jingmut ba ka dang long ka mat kaba kongsan na ka bynta ka jylla.
U Myntri Rangbah u la batai ruh ïa ki jingthmu na ka bynta ka jingïalang bei tyngka ka “Advantage Assam 2.0”, kaba la buh ban long ha ka 25-26 tarik u Rymphang ha Guwahati.
Kumba 1 lak klur, kaba pynleit jingmut ha ki bynta ba kongsan kum ka kam jngohkai pyrthei, ki Semiconductors, bad ka kam ïada ri.
U Sarma u la ai jingtip halor ki projek kiba heh, kynthup ïa ka pisa jong ka Tata Group kaba T. 27,000 klur, kaba dang ïaid shakhmat katkum ka por ba la buh.
Ka bynta kaba nyng-kong la buh ban sdang ha u bnai Naiwieng ne Nohprah mynta u snem.
Nalor kata, ka Tata Group ka la pynpaw ïa ka jingkwah ban pynmih ïa ka bording na ka sngi kaba 500 MW ha Assam.
Kum shi bynta jong ka polisi karkhana kaba thymmai, ka jylla ka thmu ban pyndonkam biang ïa ki jaka rep sha kiba dang duna ka jingpyndonkam na ka bynta ki projek bording na ka sngi.
U Sarma u la batai ba ka polisi ka thmu ban pynbun ïa ka jinglah jong ki marpoh khyndew jong ka Assam na ka bynta ka jingroi kaba neh.
Da kaba pyrkhat ïa ka jinglong ba jan jong ka Assam sha ki thaiñ kiba bun ki shipai, u Sarma u la pynpaw ïa ka jingpynbor ban khring ïa ki jingbei tyngka ha ka jingpynmih bad maramot ïa ki tiar ïada.
Kane ka jingthmu ka la long ka phang kaba kongsan ha ka jingïakren jong u bad ki nongmihkhmat jong ka Adani Group bad ka Mahindra.
Ka jingkyrpad jong u Myntri Rangbah na ka bynta ki rukom thung kam kiba don akor bad ki buit bei tyngka ba tyngeh jong ka jylla ka pynpaw ïa ka jingthmu kaba kham jylliew jong ka Assam na ka bynta ka jingroi ka ïoh ka kot katba ka dang weng ïa ki jingeh ha ka imlang sahlang bad ka saiñ hima sima kiba la slem bha.
