New Delhi, K’lyngkot 07
Kumba 126 ngut ki briew ki la khlad noh bad palat 188 ngut ki la mynsaw namar u jumai uba la khynñiuh haduh hynriew sien ba kynthup ïa uwei uba don ïa ka jingkhlaiñ 7.1 ha ka ‘Richter Scale’, ha Tibet hapoh shi kynta ha ka Sngi Ba-ar, ong ka tnad pathai khubor ‘Associated Press’. U jumai u la pynkhih ruh ïa kiba bun tylli ki ïingmala ha kiba bun ki jaka ha India, Nepal bad Bhutan.
Ka jaka ba sdang ka jingkhynñiuh, ka dei ha Tingri County jong ka Tibet, ha kaba ka jingïatyngkhuh hapdeng ki ‘Tectonic Plate’ ka India bad Eurasia, ka jia.
Kane ka lah ban pynmih ïa u jumai uba khlaiñ bor, uba lah ban pynkylla ïa ki jingjrong jong katto-katne ki lum kiba jrong tam jong ka thaiñ Himalaya.
Katto-katne tylli ki ïingmala ruh ki la twa hajan katei ka jaka, ong ki lad pathai khubor ka China.
“Ka Dingri County bad ki jaka marjan jong ka, ki la mad ïa ka jingkhih kaba jur bha, bad bun tylli ki ïingmala kiba hajan ka jaka ba sdang ka jingkhie u jumai ki la twa”, ong ka tnad pynbna khubor ka China, ka CCTV.
Ha kajuh ka por, la ïohsngew ïa ka jingkhynñiuh jumai kaba jur ha Delhi-NCR bad ha ki bynta bapher-bapher jong ka Thaiñ Shatei ka India, kynthup ïa ka nongbah ka Bihar – Patna bad kiba bun ki jaka ha ka bynta Shatei jong ka Jylla. Ïa u jumai la ïohsngew ruh ha West Bengal bad ha ki Jylla ka Thaiñ Shatei Lam Mihngi, kynthup ïa ka Assam.
Ha ka nongbah Kathmandu jong ka Nepal, la ïathuh ba ki nongshong shnong ki la phet krad na ki ïing ki sem, hadien ka jingkhih kaba jur. Ka tnad Disaster Management Authority jong ka ri ka la ong ba ïa kane ka jingkhih jumai la ïohsngew ha ki hynñiew tylli ki distrik ba long lum kiba don ha khappud bad ka Tibet.
Katkum ka jingtip na ka National Centre for Seismology, ka jingkhynñiuh jumai banyngkong – kaba 7.1 ‘magnitude’, ka dei ha Xizang, hajan khappud Nepal bad Tibet, ha ka por 6:35 baje mynstep.
Ïa kane ka jingkhlaiñ la shim ba ka long kaba khlaiñ bor bad kaba lah ban ïalam sha ka jingjulor kaba jur. Ki heh ophisar ka China, ki la ïoh lum jingtip halor ka jingheh kaba 6.8 ha sor Shigatse – ka sor ba ar ha ka liang ka jingheh ha Tibet.
Hadien kane, la ïathuh ba ki don ar tylli ki jingkhynñiuh jumai kiba 4.7 bad 4.9 na katei kajuh ka thaiñ Xizang.
Katkum ka lad pathai khubor ka China, ka CCTV, la ong ba ki la don 29 tylli ki jingkhynñiuh jumai, kiba don ka jingkhlaiñ kaba 3 lane kham heh hapoh ka jingjngai kaba 200 km na ka sor Shigatse, ha kine ki san snem ba la dep, bad baroh kitei ki long kiba kham rit ban ïanujor bad une uba la khie ha ka step Sngi Ba-ar.
