Shillong, K’lyngkot 07
Ka Meghalaya Boxing Asso-ciation (MBA) ka la sei saw ngut ki rangïakura ban leit shim bynta ha ka rynsan ïakura jong ka 8th Elite Men National Boxing Champion-ships kaba la long ha Bareilly, Uttar Pradesh kaba la sdang naduh ka Sngi Ba-ar bad kut haduh ka 13 tarik mynta u bnai.
Ha kane ka sngi sdang jong ka Preliminary bout kaba la long ha ka Sngi Ba-ar, u Khrawbok Marweiñ u la lah ban pynliem noh ïa u rangïakura na Tripura u Sayan Lodh da 5-0 point ha ka kyrdan ïalehkai jong ka 50kg, katba u Sunil Limbu u la shah rem noh ha u Huri John na Arunachal Pradesh lyngba ka ‘split decision’ da 2-3 point jong ka jingkhia kaba 55kg.
Ar ngut kiwei pat ki rangïakura ki ban sa pynkhreh ban ïa aireng ki long u Tusar Gurung ha ka 60kg bad u Balnas Sangma ha ka 75kg. Ïa kane ka kynhun la ïalam da u Plielad Mawroh kum u Coach.
