Shillong, K’lyngkot 07
Ka National People’s Party (NPP) ka la pynkhreh ban pynthymmai biang ïa ka seng ha Mawlai da ka jingthmu ban sei kyrtong na ka bynta ka ilekshon MDC, hadien ba u MDC jong ka seng, Bah Teiborlang Pathaw u la mih noh na ka jinglong dkhot da kaba pyntip ruh ba ïa ka NPP Mawlai Block la dep ban pynwai noh shisyndon.
Hadien ba la mih ha ki lad pathai khubor halor ka jingiehnoh kam jong u Bah Pathaw, na ka liang ki Nongïalam ka NPP hapoh ka Jylla ki la shong pyrkhat kam kyrkieh ban ïoh sei kyrtong da uwei pat na Mawlai konstitwensi.
Katkum ka tyllong khubor ba thikna la ïathuh ruh ba ki Nongïalam ka NPP ki la pynkhreh ban pynthymmai biang ïa ka NPP Mawlai Block da kaba lum ïa ki katto-katne nongïalam ka seng kiba dang sah.
“Ngi la pynkhreh ban sei beit ïa u kyrtong na Mawlai konstitwensi ha kane ka ilekshon. Ki don ar ngut kiba pynpaw ba ki kwah ban ïakhun na ka seng, hynrei mynta ngi hap ban pynthymmai shwa ïa ka Block ha Mawlai bad kumjuh ban jied ïa u President bathymmai ka NPP Shillong City, hadien ba u Bah Pathaw u la iehnoh ïa ka kam”, la ong uwei Nongïalam ka NPP.
La ïathuh ba ha ka jingshisha ka NPP ka la pynkhreh ban pynbna beit ïa ka kyrteng u Bah Teiborlang Pathaw kum u kyrtong na Mawlai ha ka kylla ba-ar jong ka thup kyrteng ka ban sa pynbna ha ka 10 tarik mynta u Kyllalyngkot. Hynrei namar ka jingkylla jong ka saiñpyrthei hapoh ka seng ha Mawlai, la ïoh jingtip ba ki Nongïalam ka NPP kin pyrshang ban pyndep ïa baroh ki kam ha kine ki khyndiat sngi khnang ban lah pynbna lang ha kajuh ka por ïa ki kyrteng jong ki kyrtong ba dang sah ki ban ïakhun ïa ka ilekshon MDC.
Lah ban kdew ba hadien ka jingbym sngewtynnat jong ki paidbah ïa ka seng NPP, u Bah Pathaw ha ka jingïalang paidbah kaba la long ha ka Sngi Saitjaiñ ba la dep u la pynbna ba un ïakhun noh kum u kyrtong shimet da kaba pynpaw ba ki paidbah ki long halor bad un kohnguh bad burom ïa ka rai bad jingkwah ki paidbah. Hadien kane ka jingpynbna, ha ka Sngi Nyngkong pat u la leit ban aiti ïa ka shithi iehnoh kam kum u Executive Member jong ka EC ba la ïalam ka NPP bad weng ruh ïa ka jingkyrshan na ka Executive Committee. Ha kane kajuh ka sngi u la aiti ruh ïa ka shithi ba u la mih noh na ka seng NPP.
