Shillong, K’lyngkot 08
Ka lympung ïalehkai Third Division Cricket League 2024-25 ba la pynïaid da ka Shillong Cricket Association (SCA) ka la nangjam shaphrang ha kaba ha Inningstar CC ka la lah ban pynliem noh ïa ka Sanmer CC da 6 wiket ha ka Sngi Balang.
Ha kane ka jingïakhun, ka Sanmer kaba la jop ïa ka kynting pisa, ka la kam trai ban tied nyngkong ha kaba ka la ïoh 150 run bad shah pynhap 7 wiket ha ki 20 over. U Elton u la khyrwit ïa ka shiteng spah kaba 51 run na ki 50 bol bad u Eugine u la ïoh 23 run na ki 12 bol. Katba u Akash u la shim 3 wiket bad 2 wiket da u Asif.
Haba wan shimti ïa ka pali kaba ar, ka Inningstar ka la lah ban kynjoh sha ka thong da kaba ïoh 151 run bad duh 4 wiket ha ki 18.4 over. U Akash u la tied 37 run na ki 26 bol bad u Anil u la ïoh 29 run na ki 29 bol. Katba u Eugiene bad u Dondor ki la ïoh mar shi wiket. Ïa ka nam ‘Player of the Match’ la ïohpdiang da u Akash.
Haba phai sha kawei pat ka jingïakhun kaba ar, ka Sawmer CC ka la jop da 4 wiket ïa ka Youthstar CC. Ka Youthstar CC kaba la kam trai ban tied nyngkong, ka la ïoh 145 run bad shah pynhap 10 wiket ha ki 15.2 over. U Adarsh u la tied 41 run na ki 27 bol bad u Kunal u la ïoh 23 run na ki 13 bol. Katba u Sdangroibor u la shim 3 wiket bad 2 wiket da u Tony.
Ka Sawmer kaba la wan shimti ïa ka pali kaba ar, ka la lah ban kynjoh sha ka thong hadien ba ka la lah ban ïoh 149 run bad shah pynhap 6 wiket ha ki 18 over. U Wanker u la khyrwit ïa ka shiteng spah run kaba 81 na ki 55 bol bad ïohpdiang shisyndon ïa ka nam Player of the Match. Katba u Dondor u la shim shi wiket.
