Shillong, K’lyngkot 08
Ka Shillong Lajong FC kan bteng biang ïa ka lympung ïalehkai I-League ha kaba kan pynkhreh ïa ka jingïalehkai ha la ïing pyrshah ïa ka Real Kashmir FC ha ka Sngi Thohdieng ha ka por 7 baje janmiet ha SSA Stadium, Shillong.
Kane ka long ka jingïalehkai kaba hynñiew ïa ka Lajong ha kane ka lympung hadien ba ka la jop shisien, ïakhaid lai sien bad shah rem arsien na ka bynta ban don ha ka kyrdan khyndai ryngkat 6 point.
Dangshen ha ka jingïakhun kaba la long ha ka 19 tarik u Nohprah 2024, ka Lajong ka la shah rem ha ka Delhi FC da 3-1 kol. Te kumta kane ka kynhun ka donkam ban ïalehkai bha ha kane ka jingïakhun ha la ïing na ka bynta ban ïoh ïa ki lai point.
Na ka bynta kane ka jingïakhun, ki bor pynïaid kane ka klob ki la pynbna ba ka jingdie ïa ki tiket kan sdang naduh ka Sngi Palei kiba lah ban ïoh na Electronic Centre (Police Bazaar), Cafe Shillong (Laitumkhrah) bad na SSA Stadium Ticket Counter, Polo.
