Washington, K’lyngkot:
Ka eriong kaba jur katta-katta kaba la lynshop ia ki phang Pdeng bad Mihngi jong ka ri America da ka ïor bad u thah bad kaba la pynthut ruh ia ka leit-ka wan bad ki kam-ki jam baroh jong million ngut ki paidbah nongshong shnong bad kaba la shim ruh ia ka jingim jong kumba 8 ngut ki briew ha ka jingleit lynshop sha kitei ki bynta jong ka US, hynrei ha ka Sngi Nyngkong pat, katei ka ‘eriong ka la leit hiar noh sha ki bynta jong ka duriaw ha katei ka miet.
Haba iadei bad kane, la iathuh ba palat 2,300 tylli ki liengsuiñ jong ka US ki la shah pynsangeh noh ha ka sngi kaba bud bad da ki hajar ngut kiwei pat ki la shah pynslem namar ka jingwan lysnhop jong katei ka ‘erïong Tlang, katkum ba la pyni da ka website jong ka FlightAware, kaba la dep maham lypa ia ki jingeh ba ki tnat liengsuiñ ki lah ban iakynduh naduh ka sngi hashwa jong katei ka jingjia.
Ha kajuh ka por, jan 200,000 ngut pat ki dang shong khlem ka bording naduh ka nongbah Missouri haduh ka nongbah Virginia namar ka jingbym biang jong ka jinglong- jingman katkum ka jingpynbna jong ki bor pyniaid ka tnat bor-ding ha ka miet jong ka sngi Nyngkong.
Ka tnad mariang ruh ka NWS, ka la pyntip ba katei ka jingjia, kaba long ka ‘eriong kaba jur katta-katta ha ka por Tlang kaba nyngkong eh jong ka ri ha une u snem, kan ïaid stet bad leit hiar noh sha ka phang Mihngi jong ka duriaw Atlantic ba Shathie ha katei hi ka miet.
Hadien jong katei ka eriong pat, la maham lypa ba ka jingkhriat ka lah ban jur bha ha kaba ki nongbah kum ka Kansas City la khmih lynti ba kin ioh mad ia ka jingkhriat kaba haduh shapoh ka ‘Zero Degree Fahrenheit’ (-17 degree Celsius).
Hynrei, la ong ba hapoh ka nongbah Washington pat, la ioh mad tang ia u slap u bym da jur than eh bad ka bym shym la ktah eiei ia ka jingthmu jong ki nong-ialam ka Congress ban ïakynduh lang bad ban shong pyrkhat kam hadien ka jingjop jong u Donald Trump ia ka ilekshon President kaba u la ïakhun pyrshah ia ka kyrtong President jong u Biden.
