Shillong, K’lyngkot 08
U MDC ka Nongkrem, Bah Lambor Malngiang u la pan jingshai na u Chief Executive Member ka Khasi Hills Autonomous District Council (KHADC), Bah Pynïaid Sing Syiem halor ka jingpynkha thymmai ïa ka shnong Mawsaw kaba la mih ka jingpyrshah na ki ar tylli ki Dorbar Shnong, kita, ka Umphyrnai bad Urmasi-U-Joh.
Haba kren sha ki lad pathai khubor hadien ba la dep ïakynduh ïa u CEM, u Bah Lambor u la ong ba ïa ka jingpynjari ban thaw shnong thymmai ïa ka Mawsaw la soi hi da u Bah Pynshngaiñ -lang N Syiem ha ka por ba um pat iehnoh kam kum u Dy Chief Executive Member uba dei peit ïa ka tnat Elaka.
U la ong ba katkum ka KHAD (Administration of Elaka) Act, 1991 ka KHADC katkum ka Section 3 la kdew ba na ka bynta ban thaw shnong thymmai, donkam ka jingmynjur lang jong ka shnong kmie.
Katei ka jaka kaba la ithuh shnong thymmai ka tyngkhuh lang bad ka shnong Umphyrnai kaba dang shen lyngba ka dorbar ha ka 23 tarik u Nohprah, 2024 ka la pyrshah ïa ka jingleh ka KHADC bad shim ïa ka rai ban ym shimbynta ha kane ka ilekshon MDC.
“Nga la pynpaw ha u CEM bad kane ka jingpynkha shnong thymmai ka ïatyngkhuh bad ki saw mamla, kita, ki ar tylli ki dorbar shnong, ka ophis u Syiem ka Hima Khyrim bad ka Council bad donkam ban pynbeit ïa kane. Ngan sa phah jingthoh biang sha u CEM bad ngan sa ïakren lang bad ki ar dorbar kumjuh ruh bad u Syiem ka Hima Khyrim ha kaba ïadei bad kane,” la ong u Bah Lambor.
U Bah Lambor u la ong ba ka ju don ka jingphiah shnong bad pynkha shnong hynrei donkam ka jingmynjur lang jong ka shnong kmie ban pynkha shnong thymmai.
“Kumta ngi donkam ka jingïatreilang ka District Council bad ki Dorbar Shnong ha ka synshar ka khadar ym ban leh kano-kano kaba pynmih ka kynrum-kynram,” la ong u MDC ka Nongkrem.
Kum ban pynkynmaw, ha ka 07 tarik u Kyllalyngkot, 2025, u Bah Pynïaid haba kren sha ki lad pathai khubor halor ka jingpyrshah kitei ki ar dorbar shnong, u la ong ba hadien ba u la ïohi ïa ki jingkynnoh u la wad bad peit bniah ïa ki kot ki sla kiba don ha KHADC ha kaba la shem ba ka jingpan shnong da ka Kur Kharkongor ka dei kaba naduh u snem 2016.
U Bah Pynïaid u la ong ba hadien ka jingpyrshah na kitei ki ar dorbar shnong ha kaba ïadei bad ka jingpynkha shnong, ka Council ka la khot Hearing bad phah wanrah ïa ki kot ki sla ha kaba ka ophis ka shem ba ki biang lut ki kot ka Kur Kharkongor bad kumta ka la leh la ka kamram ban pynshkem.
Dang ha ka 2 tarik u Kyllalyngkot, 2025, ka Dorbar Shnong Urmasi-U-Joh ka la kynnoh ba ka jingthaw shnong thymmai kaba la tip kum ka Mawsaw da ka Council ka dei tang ka buit u Bah Pynïaid ba un jop ïa ka ilekshon MDC na Nongthymmai.
Katei ka jaka kaba la ithuh shnong thymmai ka tyngkhuh lang ruh bad ka shnong Umphyrnai kaba dang shen lyngba ka dorbar ha ka 23 tarik u Nohprah, 2024 ka la pyrshah ïa ka jingleh ka KHADC bad shim ïa ka rai ban ym shimbynta ha ka ilekshon MDC ka ban wan.
U Sirdar ka Shnong Urmasi-U-Joh, u Bah P Wankhar, u la ong ba ka jingthaw shnong ïa ka jaka kaba dei hapoh u pud synshar ka shnong bad kaba la kam da ka Kur Kharkongor na Nongthymmai bad Pohkseh ka dei ka bym ïahap satia.
U la kynnoh ba ka dei tang ka jingïasylla u Bah Pynïaid bad ka Kur Kharkongor tang ba un ïoh jingkyrshan ha ka ilekshon namarba u Bah Pynïaid.
Ka rai kaba pynjari ban ithuh shnong ia ka Mawsaw ka la mih ha ka 13 tarik u Nohprah, 2024, kaba dei ruh ka sngi ha kaba u Bah Pynshngaiñlang N Syiem u la hiar shuki ha ka por janmiet kum u Dy Chief Executive Member.
Ha katei ka jaka, la ong ba sha ka liang kadiang jong ka surok na Lad Smit sha Smit ka hap hapoh ka shnong Umphyrnai, katba sha ka liang kamon pat, ka jaka kaba kham bun, ka hap hapoh ka dorbar shnong Urmasi-U-Joh.
