Paris, K’lyngkot:
Ka France ha ka Sngi Nyngkong, ka la pyntip ba ha kane ka sien ba nyngkong, la don uwei u nongshong shnong uba la ioh kem ia ka jingpang ‘Mpox kaba ju ia tip paidbah kum ka Monekeypox. Kane ka long tang hadien katto- katne taiew ruh ba ka World Health Organization (WHO) ka la maham halor ka jingma ba katei ka jingpang khlam ka la wanrah ia ka pyrthei ha kine ki sngi.
Ia utei u khñiang jingpang Clade 1B, la lap na ka thaiñ West jong ka Brittany bad ka tnat ka koit ka khiah ka la ialeh ban bud-dien ia ka jinglong jingman jong utei u briew bad la phah shong pynkyrpang noh ia u marwei katba dang ialeh ban sumar ia katei ka jingpang kaba u la ioh kem.
Ia ka Mpox, la ju tip paidbah kum ka Monkeypox baroh shi katta bad ka don ruh ka jingiadei bad ka jingpang ‘Smallpox’, ba la saphriang lyngba jong u jait khñiang jingpang uba pur na ki mrad ba ioh pang sha ki briew kiba iatyngkhuh kam lane kiba ri bad sumar ia ki.
