Shillong, K’lyngkot 08
Ka ‘thei ïalehkai phutbol ka Jylla, ka Bonifilia Shullai, kan pynkhreh ban leit shim bynta ha ka prokram jied nongïaleh-kai na ka bynta ban ïoh rung hapoh ka kynhun ki ‘thei ïalehkai U-17 jong ka ri India ka ban long ha Bengaluru naduh 10 haduh 20 tarik mynta u bnai.
Lada kane ka urlong, kan long ka sien kaba ar ïa ka Bonifilia ba kan leit mihkhmat ïa ka ri India. Mynshem snem ka la ïoh ban mihkhmat ha ka SAFF U-16 Women’s Championship 2024 kaba la long ha Nepal, ha kaba ka India ka la wan ha ka kyrdan ba-ar hadien ba ka la shah rem noh ha ka Bangladesh lyngba ka tie-breaker da 3-2 kol.
Kaba kham sngewtynnad shuh shuh ka long ba ka Bonifilia ka la ïoh ban thep shi kol hadien ba ka India ka la jop da 10-0 kol ïa ka Nepal.
Ka Bonifilia ka dei ka khun jong u Bah Christopher Dohling bad Kong Bani Ember Shullai na Lawmali Pyllun. Ka la sdang ban paw ha ka sap ïalehkai lyngba ka madan rit kaba don ha Pasteur ha kaba ka Lawmali Pyllun ka la pynlong ïa ka U-12 Inter House Football ha u 2018 bad la ailad kyrpang ïa ka ban ïalehkai lang bad ki khynnah shynrang.
Ka la mihkhmat ruh ïa ka Jylla ha ka Junior Girls National Football Championship 2023-24 kaba la long ha Jaipur bad Jodhpur kaba ha Rajasthan ha u Risaw 2023. Hadien kata ka Bonifilia ka la shah jied ban shah hikai pyntbit ha ka Baichung Bhutia Football Academy bad ka la ïoh ruh ka lad ban mihkhmat ïa ka Gerhwal FC New Delhi bad ruh kum ka kapten ha ka Delhi Women Premier League.
Halor ka jingleit shim bynta sha katei ka prokram, na ka liang ka shlem ai jinghikai jong ka 4 For All Football Academy kaba don ha Diengïong, Shillong ka la ai khublei kitbok na ka bynta ban kyntu ïa ka ba kan trei shitom khnang ban pynurlong ïa ki jingangnud ha ka jingïaid lynti jong ka kam ïalehkai phutbol.
