Jowai, K’lyngkot 08
Ka Jalapang SC ka la long ka lahduh ha ka lympung ïalehkai ‘8th Invita-tion Knockout Football Tournament’ ba la pynïaid da ka Wahïajer Sports Club ha madan Wahïajer Sports Complex.
Kane ka la wan urlong hadien ba ka Jalapang ka la pynliem noh ïa ka Nongdawah SC da 6-2 kol ha ka jingïakhun phainal kaba la long ha ka Sngi Balang.
Haba phai sha ka jingïalehkai ka la long kaba ïathaiñ bha na baroh ar liang kynhun bad haduh ka por kaba la buh ki la ïakhaid mar 2-2. Ïa ki kol na ka bynta ka Nongdawah la thep da u Chanmitre Thma (40) bad Shano Tariang (65). Katba na ka bynta ka Jalapang SC la thep da u Oliver Pale (57) bad Kitbok Pale (80+4).
Ban ïoh ïa ka rai jop rai rem, ki nongpynïaid ïa ka jingïalehkai ki la rah noh sha ka extra-time bad dei hangne ka Jalapang ka la ïoh ban pyntam da 4 kol. U Kitbok Pale u la khyrwit syndon da ka hat-trick ha ka minit 87, 89 & 94 bad ïa kawei pat la thep da u Kynsai Luhuid (96).
Ïa kane ka lympung la wan ban pynhap pyrda da u Superintendent of Police ka West Jaiñtia Hills District u Bah Chemphang Syrti ha ka jingdonlang u Waheh shnong Bah Sanwotki Laloo, President ka Thadlaskeiñ Sports Association u Bah Kmenlang Shylla nalor kiwei pat.
Hadien ka jingïalehkai la sam khusnam sha ka lahduh da ka song pisa kaba T. 2.30 lak tyngka, bad ka kynhun kaba wan ba ar T. 1.20 lak tyngka ryngkat ka trophy. Ïa ka nam ‘Man of the match bad Player of the Tournament’ la ïohpdiang da u Kitbok Pale, Top Scorer ka leit sha u Stephan Pale uba la thep 7 kol bad ka nam ‘Best Goalkeeper’ la ïoh da u Daemitre Dan Jalapang baroh kine ki rangïalehkai ki dei na ka Jalapang SC.
