Washington, K’lyngkot:
Katei ka nonghikai skul na US kaba dang pun khun, ka la duh noh syndon ia ka jingim katba ka dang leit kiew ia ki lum jong ka dew lynnong ha Greece.
Kane ka la jia ha ka 23 tarik u Nohprah, katba katei ka nonghikai kaba ju ithuh kum ka Clara Thomann, kaba la don 33 snem ka rta bad kaba dei ruh ka nonghikai ha ka sobjek ‘Science’ ha ka skul hapoh Santa Barbara, ka dang ialeit shangkai pyrthei bad u briew jongka hi- u Elliot Finn ban pynlut ia ka shuti Tlang jongki ha Greece.
Kitei ki shijur ki leit sha ktei ka dew lynnong jong ka Greece, ban ioh mad ia ka jingkmen bad ka jingsngewtynnat jong ka jingkiew lum, ha kaba ki leit ban kiew ia utei u lum ba hajan jong ka Preveli Monastery kaba don ha katei hi ka dew lynnong ha ka por shiteng sngi jong katei ka 23 tarik u Nohprah, ha kaba katei ka nonghikai kynsan ka la btuit bad hap na utei u lum uba jrong kumba 164 phut. La ong ba ha katei ka por ba katei ka nonghikai ka hap na utei u lum, ka la pun kumba 6 bnai ia itei i khun iba don ha kpoh jongka.
Hadien ba u Finn u la pyntip sha ki bor pyniaid, ki bor pyniaid ki la phah ia ki kynhun iarap ban leit her mar- mar sha katei ka jaka, ha kaba ki briew jong ka kynhun iarap ki la ïakhun shitom da ki bun kynta ban lap ia ka Thomann na katei ka khlaw kaba 164 phut ka jingjrong.
Hadien ba la lap ia ka Thomann, la ong ba ki kynhun iarap ki la leit pynkit noh hi ia ka mar-mar sha jakasumar ha kaba ki la iathuh ba ka Thomann ka la mynsaw jur ha ki bynta jong ka shadem bad ka shyieng khlieh ruh ka la orpait. Nalor kata, itei i khun i ba ka pun ruh ki khlem lah shuh ban pynim ia i bad ka Thomann ruh tang hadien 6 sngi; kata ha ka 29 tarik u Nohprah ka la khlad noh syndon namar ka jingbun palat jong ki jingmynsaw bad ki jingshitom ha ka met jongka.
Na ka liang ki bahaiing- bahasem jong ka Thomann, ki la rai ban nohsynñiang pat ia ki dkhot met jong ka sha kiba donkam kynthup ia u dohnud, ki tor bad ki pyllew khmat jongka, kiba dang lah ban pyndonkam bad ban ai jingpynim ia kiwei pat kiba donkam jingim.
Haba iadei bad kane, ia ka met basah jong ka Thomann pat la pynkit noh sha ka jakasah jongka ha Athens ha ka sngi ba nyngkong jong u snem thymmai 2025 bad la pyndep don burom ia ka met jongka ha ka 3 tarik u Kyllalyngkot.
Kumjuh na ka liang jong katei ka skul Dos Pueblos High School ba ka Thomann ka hikai, ki la leit ban pyndon burom ha ka sngi tep jong ka Thomann, namar ka jingaiti met bad mynsiem jong katei ka nonghiaki ha ka por ba ka dang hikai ha katei ka skul mynba ka dang im baroh shi katta.
