Nongpoh, K’lyngkot 09
U Lat ka Jylla, CH Vijayashankhar ha ka jingïadon ryngkat jong u Shivraj Singh Chauhan, Myntri jong ka Sorkar Pdeng ba dei khmih ïa ka tnat Rural Development, Agriculture bad Farmers’ Welfare ha ka Sngi Palei, u la plie paidbah ïa ka jingrakhe Jubili Ksiar (Golden Jubilee) bad ka Farmers Expo ba ar sngi lynter jong ka Indian Council of Agricultural Research (ICAR), Research Complex kaba don ha Umiam.
Ha kane ka sngi, la wan ban ïadon ryngkat ruh da u Myntri Rangbah ka jylla, Conrad K Sangma, ka Myntri ka tnat ka rep ka riang ka jylla, Kong Ampareen Lyngdoh, u Chief Secretary ka jylla, Bah DP Wahlang nalor kiwei kiwei ki kynrem ki lyndan.
Kum ban shu kdew hangne, ïa kane ka jingrakhe Jubili Ksiar jong ka ICAR-RC Umiam, ha ka jingshisha la dei ban wan plie paidbah da ka President jong ka ri, ka Droupadi Murmu, hynrei namar ka jingthut jong ka mariang bad ka jingbym lah ka liengsuiñ ban her, la pynsangeh noh ïa katei ka jingwan jong ka President ha ka minit kaba khatduh.
Haba ai jingkren ha kane ka sngi, na ka liang u Lat ka Jylla, u CH Vijayashankar, u ai ka jingïaroh ïa ka ICAR kaba la lamkhmat ban wad bniah bad noh synñiang shikatdei ban kyntiew ïa ka kam rep kam riang bad kam ri jingri, kaba la ai jingmyntoi shibun ïa ki paidbah nongrep jong ka ri hi baroh kawei.
U CH Vijayashankar u la ïaroh ruh ïa ka jylla Meghalaya ba ka dei ka jylla kaba don ïa ka um kaba khuid tam hapoh ka thaiñ shatei lam-mihngi baroh kawei bad kaba don ruh ïa ki jaka jngohkai pyrthei kiba pawnam bad itynnad ha ka thaiñ nalor ka jingdon jong ki kynbat dawai bad ki soh ki pai kiba kham pher bad kiba kham don bun ka kynja dawai haba nujor na ki jingthung jingtep kiba pynmih na kiwei pat ki jylla, da kaba ai nuksa kum ïa u shynrai Lakadong uba don haduh 8.7-8.9 ka curcumin, katba u shynrai uba pynmih na Karnataka u don tang 3.7 haduh 4.2 ka curcumin.
U Myntri Rangbah ka jylla, Conrad K Sangma, ha ka jingkren, u la ai jingïaroh ïa ka ICAR halor kane ka jingïaid lynti kaba 50 snem kynthih, da kaba ong ba ka dei ka shlem kaba tbeh jingshai nyngkong ha kiba bun ki bynta kiba ïadei bad ka kam rep kam riang, ban kyntiew ïa ki nongrep lyngba ki jingwad bniah bad jingstad kane ka juk kaba mynta.
Na ka liang jong u Shivraj Singh Chouhan ha ka jingkren, u la ong ba ka jylla Meghalaya ka dei kaba ‘riewspah ha ka mariang sawdong sawkun bad pynpaw ba ka por kala donkam ban don ïa ka jingïatreilang ryngkat ryngkat hapdeng ka ICAR, ki KVK, ka Sorkar Jylla lem bad ki skulbah kiba ïadei bynta bad ka kam rep kam riang, kam ri jingri ban kyntiew shuh shuh ïa ki nongrep bad ka kam rep kam riang ka jong ki.
Katba na ka liang jong ka President ka Ri, ka Droupadi Murmu ha ka jingkren kaba la dep ban record lypa, ka la ai khublei kyrpang ïa ka jingdap 50 snem ka jingïaid lynti jong ka ICAR-RC Umiam kaba la shakri halor kiba bun ki liang ban kyntiew ïa ka kam rep kam riang, kam ri jingri bad kiwei kiwei sha ka thaiñ shatei lam-mihngi hi baroh kawei.
Ha kane ka sngi, la sakhi ruh ïa kitei ki kynrem ki lyndan bad ki heh ki haiñ kiba la leit ban jngoh ïa ki dukan bapher bapher kiba la buh ha katei ka Farmers Expo bad ïoh ruh ban ïakren bad ki nongdie jingdie ïa ki tiar ki tar kiba la wan na kylleng ki jylla ka thaiñ shatei lam-mihngi.
