Shillong, K’lyngkot 09
Ka Rising CC ka la pynliem noh ïa ka United Mates da 3 wiket ha ka lympung ïalehkai Third Division Cricket League ba la pynïaid da ka Shillong Sports Association ha ka Sngi Palei ha madan Urkaliar, Shillong.
Ha kane ka jingïakhun ka United Mates ka la shimti ban tied nyngkong ha kaba ka la ïoh 102 run bad shah pynhap 8 wiket ha ki 20 over. U Rohit Ray u la tied 29 run na ki 39 bol. Katba u Prasad Pradhan u la shim 3 wiket bad u Bikash Lama 2 wiket.
Haba wan shimti ïa ka pali ba ar, ka Rising ka la lah ban kynjoh sha ka thong hadien ba ka la lah ïoh 103 run bad shah pynhap 7 wiket ha ki 14.4 over. U Rahul Sharma u la tied 41 run na ki 30 bol bad u Prasid Pradhan u la ïoh 20 run na ki 15 bol. Katba u Arnab Rahman u la shim 3 wiket bad u Rohit Ray 2 wiket. Ïa ka nam Player of the Match la ïohpdiang da u Prasid Pradhan.
Haba phai sha kawei pat ka jingïakhun ba ar, ka Young Fighters ka la lah ban pynliem noh ïa ka Municipal da 6 wiket. Ka Municipal kaba la kam trai ban tied nyngkong, ka la ïoh 107 run bad shah pynhap 9 wiket ha ki 20 over. U Chotelal Gupta u la tied 30 run na ki 32 bol. Katba u Vishal Das u la shim 3 wiket bad u Anuj 2 wiket.
Ka Young Fighters haba wan shimti ban beh ïa ka thong, ka la lah ban kynjoh da kaba ïoh 111 run bad shah pynhap 4 wiket ha ki 12.4 over. U Mukul Kumar u la tied 42 run na ki 15 bol bad u Sanju Shah u la ïoh 37 run na ki 34 bol. Katba u Rahul Shah bad u Chandra Mohan ki la shim mar 2 wiket. Ïa ka nam Player of the Match la ïohpdiang da u Mukul Kumar.
