Shillong, K’lyngkot 09
U Myntri ka tnat Pule-Dangle ka Jylla, Rakkam A Sangma, u la ong ba kam don satia kano-kano ka jingthmu ban lehniam da kaba pynlong ïa ka jingïaseng Khristan ha ka sngi plie ïa ka skulbah Capt. Williamson Sangma State University, hynrei ka dei ka jingïalang kaba pynlong da ka Sorkar bad kan ym don kano-kano ka jinglehniam, kan dei tang ka jingkyrkhu ïa katei ka skulbah.
Kane ka jingkren u Myntri ka long hadien ba ka la mih ka jingpyrshah halor ka jingkren jong u dang shen ban pynlong ïa ka jinglehniam Khristan ha ka por ba plie ïa kane ka skulbah ka ban long ha ka 13 tarik mynta u Kyllalyngkot.
Haba kren bad ki lad pathai khubor ha ka Sngi Palei, u Rakkam u la ong ba ha kane ka jingplie, yn khot ïa baroh naduh ki nongïalam Balang kumjuh ïa ki nongïalam na kiwei ki jait niam ruh, da kaba u la kyntait ba ka Sorkar ka thmu ban pynlong ka jinglehniam katkum ka rukom ka jingngeit ki Khristan.
“Kam don eiei kaba bakla ban pan ka jingkyrkhu bad ym dei ba thmu ban pynlong kum ka jinglehniam. Ha ka jingplie, la khot lang ïa baroh naduh ki nongïalam niam na ki kynhun bapher-bapher ruh namar ba ka dei ka prokram jong ka Sorkar. Ngam shym la ong ban lehniam Khristan, hynrei ka dei ka jingbatai bakla ïa ka jingkren jong nga”, la ong u Rakkam.
U Myntri u la pynshai da kaba pynpaw ba u khlem ong satia ban pynlong ïa ka jinglehniam Khristan, hynrei ka lah ban dei ka jingpyndonkam bakla ïa ka jingkren jong u.
“Ngam tip ha kano ka rukom la sngewthuh bakla namar ba nga khlem kren kumba ka la paw. Kam don eiei kaba bakla ban pynlong ïa ka jingkyrkhu na ka bynta ka skulbah bad kumjuh na ka bynta ka Jylla”, u la bynrap.
Ha kajuh ka por u Rakkam u la ïathuh ba ha katei ka sngi plie ïa ka Capt. Williamson Sangma State University, yn don lang u Myntri Rangbah, Conrad K Sangma, u Symbud Myntri Rangbah, Bah Sniawbhalang Dhar, u Lamphang ka Ïingdorbar Thaw Aiñ, Thomas A Sangma bad kumjuh ki nongïalam na ki kynhun niam bad jingngeit bapher-bapher.
