Da u ESSJE
U Khasi u don ka bor pyrkhat bad ka jingngeit ba u wan sha kane ka pyrthei ban KAMAI ïA KA HOK kiwei kiwei ki niam ruh ki ngeit ïa kane ka bynta. U Khasi u pynshong nongrim ïalade bad U Blei – halor KA HOK, KA ïAID HOK, KA LEH HOK BAD KA KAMAI HOK ha kiei kiei baroh. U ïaid tang kawei ka lynti kata, ban KAMAI ïA KA HOK bad um nang ban leh arsap halor kane ka bynta.
Teng teng ngi ïohi ha kane ka juk mynta,ba don kiba leh tynneng, kum ki riewhok riew shida ban pynpaw sha ka pyrthei kum ki riewblei ba shisha, hynrei ki don pat ka buit ban shet shukor ïa ki riew lui lui, kine ki dei kita KI SURI KUP SNIEH LANGBROT. Kine ki jait jingthaw kim salia ban shet shukor ïa U Trai Nongbuh Nongthaw U ba la wanrah ïa ki sha kane ka pyrthei ban KAMAI ïA KA HOK. Don lei lei kiba kum kine ki riew rangbah kiba khmih lynti ba ki paidbah kin ïaroh ïa ki haba ki kren shaphang kane ka bynta (subject) KAMAI ïA KA HOK. Kiba kren pyrshah ïa kine ki nongkren ki ong, U INGKHONG SHYLLANG MAT. Kaba pynglyngngoh shuh shuh ïa kiba bun balang ba ki ïaroh ïa kitei ki nongkren kiba kren ïa katei ka bynta (subject) KAMAI ïAKA HOK. Ki da ong kume, PHI ïOHI u bapli u wan sha kane ka pyrthei ban KAMAI ïA KA HOK, bad U Trai Nongbuh Nongthaw u la kyrkhu haduh ba u la kit spah da ki klur tyngka, i kumba un kdor sa u budlum, u da ïoh ban tei ka ïing paki dulan, wat la ka jingioh jong u ka ïa pher bak – ly – bak naka kam ba u trei. Naei keiñ u ïoh katne katne la kylli uwei u rangli bapli, imat u mane Blei ïa ka spah (tyngka) mo ade ? Haba u briew u la mane Blei ïa ka tyngka, um don shuh, kata ka jingïatip lem bad u thom naphang tang ban ïoh ïa katei ka jing-thmu. Kine ki riew arsap ki nangbha ban pyni sha ka pyrthei ïa ka jinglong babha bad riew khuid jong ki – ki long kiba pnah ktien haduh katta katta, wat ha ka niam ruh ki don kum ki ne ki jait jingthaw. U B. B. Lyngdoh (bam kwai ha dwar U Blei) uba la long Chief Minister ka Meghalaya u kren ïa kine kiei kiei ha ka jingthoh shaphang ka jingim jong u ha ka saiñ pyrthei bad kiwei kiwei. “My experience in public life and others reflection’ u ong kumne, ‘A man who steals and a man who received stolen goods are equal sinners and are liable for the same punishment under the Indian Penal Code, Certain Church leaders are joyfully receiving money stolen from the Government, Co – operative Societies, from Bank, Clubs etc they are corrupting the people.’ Ha ka ktien Khasi ka mut kumne, don ki rangbah niam kiba kmen haba ki ioh ïa ka tyngka tuh na ka sorkar, Co – operative Societies, Banks, Clubs bad kiwei kiwei, ki hap hi ha kajuh ka jingpynshitom kum ki nongtuh hi, katkum ka aiñ. Kine ki pynjngut ïa ka jinglong briew man briew bad ka hikai ruh ïa ki jingbamsap (KAMAI BYM HOK) U Bah Bring ha katei ka juh ka kot u ong kumne, ‘Beware of moral religious pride,’ the most discussting in a man, ‘is the holier than thou altitude, Moral and religious pride may be the worst, it tries to build hypocracy which is unforgivable sin ! Ha ka ktien Khasi ka mut kumne, sumar bha ïa lade na kine kiba sngew sarong ïa ka jinglong bha bad ka jingkit niam jong ki. Kaba pynsohsat ïa ka bor pyrkhat jong u briew ka long ba don kum kine kiba sngewhok ba tang manga ban ïa kiwei kiwei.
Ka jingsngew sarong hok ban ïa kiwei kiwei, ka long kaba sniew palat bad kane ka wanrah ïa ka jinglong arsap ha u briew bad ka long ka pop ka bym lah ban map dalei lei ruh. U Babu Soso Tham u la kren shaphang kane ha ka Duitara Ksiar shaphang KI DAW JONG KA JINGLEIT JINGïASENG kaba phylla ka long ba balei u ne u Myllung u kynriah balang shawei pat ? ka shong eh ha ki riewstad ka juk mynta kiba pule ha ki University ban wad ïa ka tynrai jong kine kiei kiei. Ha ka kitab u Mathaios Lynnong 7 Dkhot 21 ‘……………… shibun kin ïa ong hanga ha kata ka sngi, AH TRAI AH TRAI, ngim shym la ïalap ha ka kyrteng jongme ? Ngim shym la beh ïa ki ksuid ha ka kyrteng jong me ? Ngi ngim shym la leh ruh ki kam bha ha ka kyrteng jong me ? Ynda kumta nga ruh ngan ong pyrshah ïa ki, ngam ju la ithuh ïa phi : Khie leit noh na nga, phi kiba ju trei bymman. Haba pyni ïa ka film Mother Theresa bakhuid ha Soso Tham Auditorium nga ïohi shwa ïa ka film u Purno Sangma (Late) ba u kren ha ka Parliament. Ha kane ka jingkren jong u, utei u M. P. u la ong kumne haba uwei na ki para M. P. u la kylli ïa ka Mother Theresa bakhuid, ba kumno nga lah ban long u briew ba janai ha ka jingim jongnga. Ka Mother Theressa bakhuid ka la ong kumne, lada phi long u Hindu, phi dei ban long u Hindu babha bad lada phi long u Muslim phi dei ban long u Muslim babha bad lada phi long Khristan phi dei ban long u Khristan babha etc. Na kane lah ban ring dur ka pleng mana la ka niam ki don ki babha bad kiba bud hok ïa ka jinghikai ka niam ha ka jinglong jong ki. Don ar jait ki Khristan, ki Khristan kiba pynpaw sha ka pyrthei ïa ka jinglong Khristan bad ki Khristan ki bym pynpaw bad ki shu leh ïa ki kam katkum ka jinghikai U Trai. U Khasi um sngewtynnad ïa ka bam ei ne ïohei bad ka map ei. U Khasi u don ka jingngeit haba wan hap ka shitom ka lanot ha ka ïing ka sem, u da wad ïa ka daw balei ka leit long kumne la ka dei na ka daw ïing ne na kano kano ka daw. Haba u lap ïa ka daw u dwai u phirat ba U Blei Trai Kynrad u Nongbuh Nongthaw ba un pyllait ïa U bad ïa ka ïing ka sem baroh kawei bad ki longdien jong u ruh. Haba kut lad u Khasi u ong, katba mon ma ki ki Blei. U ngeit ruh ba um ju bsa ïa ki khun ki kti da ka KAMAI BYM HOK kata kaei kaei kaba u ïoh na ka ba bam sap, bym klop bad kaba ioh da ka khñiot beiñ (exploit) ïa ki briew kiba tlot bad ba rangli. Ka jingbsa ïa ki khun ki kti da ka KAMAI B YM HOK ka long kaba sang, tieng ïoh ka wan hap ka lanot ha ki khun ki kti. U Blei U long U Babha bad lada u briew u pyndep ïaka jutang bala ïa teh bad U Blei, U Blei U Kyrkhu kyrdoh ïa u bad ka longdien jong u kaba phyrnai.
Ka long kaei kaei kaba phylla, ba ha ka por ba ngi dang leit skul, ngi shem la jan baroh ki khun ki kti jong ki nonghikai ki long kiba longbriew manbriew lut ha ka jingim jong ki. Kine ki long ki soh ka jingkyrkhu U Blei ïa ka jingtrei shitom jong ki, kim don lynti ban bam sap ne ban bam klop, ki im da ka KAMAI HOK. Ka juk mynta ka dei ban peit nuksa ïa kitei ki nong hikai skul. La thoh shakhmat shaphang kane kiei kiei. U Khasi u ngeit ruh ba ka mar ïohei ym bit ban rah sha ïing. Ngi kynmaw haba dang khynnah, uwei na ki paralok u la ïoh tam ei ïa ka lut San Tyngka na surok hynrei ki kmie ki kpa kim shah ïa u ban wanrah sha ïing ïa kata ka tyngka ne ban thied ïa ki mar ki mata ban wanrah sha ïing ki kheiñ ba ka long kaba sang ban pynïakhleh lang bad ka kamai umsyep. U Khasi u ngeit ruh ïa ka NONGKYLLIANG, The Philosophy and essence of KA NIAM KHASI. Ka NONGKYLLIANG katkum ka jingsngewthuh jongngi, ka long kumba phi bet kumta phin ot. Lada u briew u leh kano kano ka kam babha U Blei Trai Nongbuh Nongthaw u kyrkhu ïa ka pateng jong uba kan long kaba phyrnai. Hynrei lada u briew u leh pyrshah ïa kaei kaei ïa ka mon U Blei – ka jynjar ka lanot ka hap ym tang ha u hynrei wat ki long-dien jong u. ïa kane la dep pyni shakhmat ha kane ka jingthoh.
Ki nongïalam ka Ri kiba mynshwa kum I bah B. B. Lyngdoh, S. D.D. Nicholsroy, H. Hynñiewta, Prof. G. G. Swell, D. D. Pugh bad M. N. Swer bad kiwei kiwei kim shym la iohnong eiei da ka jingshakri ïa ka Hills State.
Don pat kiba sngewthuh bakla ïa ka ktien MAPEI. Ka don ka jingshisha ba ïa ki pop jongngi la bah khala ban MAPEI. Don kiba rieh tngen ha ka ktien MAPEI bad ki leh ïa ka juh shi kajuh ka pop ba ki tip ban ioh MAPEI. Haba U la MAPEI ïa ki pop ka mut ba ngim leh shuh ïa kita ki pop bad ngin kylla kaba mut bad ban panmap shi panmap bad ban MAPEI ka long ka bym long bad kaba ym lah ban map.
