Shillong, K’lyngkot 09
Ka Shillong Lajong FC ka la long ka kynhun kaba nyngkong eh ban jam sha ka semi final ha ka Meghalaya State League 2024. Kane ka la wan urlong hadien ba ka la lah ban pynliem noh ïa ka lahduh jong ka aïom ba la dep, ka Rangdajied United FC da 3-1 kol ha ka jingïakhun quarter final kaba la long ha ka Sngi Palei ha Wahïajer Stadium, West Jaiñtia Hills District.
U Leitlang Syiemlieh (4) u la pynkhih jar nyngkong eh na ka bynta ka Rangdajied shwa ba u Ïohborlang L. Lyngkhoi um thep ar kol ha ka minit kaba 7 lyngba ka penalty bad kawei pat ha ka minit ba 62. Kawei pat ka kol ka dei ba la ïarap pynthep da u rangïalehkai ka RUFC u Manbhakupar Ïawphniaw (87).
Ha kane ka jingïakhun dei ka Rangdajied United kaba la ïoh ban pynkhih jar nyngkong eh lyngba u Leitlang ha ka minit kaba saw kaba sdang ban pynkhluit ïa kane ka jingïakhun bad katno tam lei ïa ka kynhun jong ka Shillong Lajong kiba la sdang ban kyntiew pat ïa la ka rukom ïalehkai.
Ha shwa ban kut jong ka kylla step, ka Shillong Lajong ka la ïoh ïa ka kabu ksiar ban pynphai kylla shwa ïa kane ka shi kol kaba la wan ha ka dur ka penalty ha ka minit ba 7 lyngba u Ïohborlang Lyngkhoi, ha kaba une ujuh u rangïalehkai u la ïoh pat ban thep sa ïa ka kol ba ar ha ka minit ba 62 kylla miet.
Hadien ba ka Shillong Lajong ka la tam kylla shakhmat, ki rangïalehkai ka Rangdajied United ki la pyrshang ban ïakhun tyngeh ban ïoh pynphai ïa kane ka kol ba ki la shah tam, ha kaba ka jingïakhun hapdeng ka madan ka long kaba itynnad shisha.
Hapdeng ka jingïai pyrshang ban nang ïoh kabu ban pynkhih shuh shuh ïa ka jar, te kumta ka bol ka la leit sha ka Shillong Lajong, hadien ba uwei na ki rangïalehkai ka Rangdajied United, u Manbhakupar Ïawphniaw ha ka jingbakla u la kum pyndei ïa ka bol kaba la rung pynban sha kol la jong. Kane ka la jia ha ka minit 87, ka khyllipmat ba ka por ka la thmit palat ïa ka Rangdajied ban wanphai biang sha ka thong jong ka jingïakhun bad ha kaba kut ka la mad ïa ka jingshah rem.
Hadien kane ka jingïakhun, yn bynrap sa ki lai tylli ki jingïakhun quarter final jong kane ka lympung, ha kaba ar tylli la buh ba kin long ha ka 11 tarik mynta u bnai (Sngi Saitjaiñ) ha kaba kawei ka jingïakhun kan long ha ka nongbah Shillong ha SSA Stadium hapdeng ka Mawlai SC pyrshah ïa ka Khliehmawlieh Youth Club bad kawei pat ka jingïakhun kan long hapdeng ka Sutnga SS&CC pyrshah ïa ka Ladthadlaboh SC ka ban long ha madan East Jaiñtia Hills District Dienshynrum, Khliehriat bad kine baroh ar tylli ki jingïalehkai la buh ba kin sdang ha ka por 1 baje nohphai sngi.
Katba ka jingïakhun quarterfinal basaw bad bakhatduh jong kane ka lympung kan long ha ka 14 tarik hapdeng ka Chipakkore FC pyrshah ïa ka Rymbai Shkenshynriah FC ka ban long ha P.A Sangma Stadium, Tura, West Garo Hills ha ka por 1 baje nohphai sngi.
