Shillong, K’lyngkot 09
Ka Khasi Students’ Union (KSU), Umsning Circle ha ka Sngi Balang ka la phah leit phai noh ïa ki bar-jylla kiba thmu ban wan rung be-aiñ sha Meghalaya.
Ka seng lyngba ka Organising Committee hapoh ka jingïalam u Organising Secretary, samla Prosper Lyngdoh, Vice-President, samla Herliroy Suting ha ryngkat ki dkhot ka Umsning Circle ki la ïoh ban bat ïa kitei ki bar-jylla kiba la lait tuh na ka ‘Infiltration Check Gate’ kaba don Hadien ka jingïoh jingtip kaba tikna na ki nongïalam ka seng halor ka jinglait tuh jong kitei ki bar-jylla, na ka liang ka seng (Umsning Circle), ka la ap pyrman ban bat bad ai jingsneng bad hadien la ïoh ban pynphai lut ïa baroh sha ka jaka kaba ki wan.
“Kaba sngewlyngngoh ka long ba kumno kine ki ïoh ban rung laitluid shane sha ka Jylla tang lyngba ka ‘receipt’ jong ka KHADC tang ha ka dor kaba T.700 khlem da pyntikna ïa kita ki kot ki sla lane ki ‘labour licence’ kiba biang,” ong ka kyrwoh na ka seng.
Kumta ka seng kaba ju peit pyrman ïa ka jingwan rung kyrthep jong ki bar-jylla hapoh ka Jylla khlem kino-kino ki kot ki sla kiba biang, ka la maham jur ba lada lap kan leh da kaba tyngeh bad maham ruh ïa kito ki briew ba ju smat ban wanrah ïa ki briew nabar jylla ba ki dei ban pynbiang shuwa ïa ki kot ki sla kiba biang lem kumta ka seng kan shim da ka sienjam kaba tyngeh.
