Shillong, K’lyngkot 10
Ka NWCC bad ka Sportive Junior ki la ïoh jingjop ha kaba sdang ïa ka lympung ïalehkai Second Division Cricket League 2025 ba la pynïaid da ka Shillong Cricket Association (SCA) ha ka sngi Thohdieng ha madan Urkaliar, Shillong.
Ha ka jingïakhun kaba nyngkong, ka NWCC ka la pynliem noh ïa ka Nongpdeng CC da 4 wiket. Ka Nongpdeng kaba la kam trai ban tied nyngkong, ka la ïoh 165 run bad shah pynhap 6 wiket ha ki 20 over. U Maitshaphrang Khongjee u la khyrwit ïa ka shiteng spah da kaba ïoh 88 run na ki 51 bol bad u Wanbor Lamare u la ïoh 19 bol na ki 13 bol. Katba u Lakhan Lal u la shim 2 wiket na ka bynta ka NWCC.
Haba wan shimti ïa ka pali ba ar, ka NWCC ka la lah ban kynjoh sha ka thong da kaba ïoh 167 run bad shah pynhap 6 wiket ha ki 20 over. U Sanjiv Ghosh u la khyrwit ïa ka shiteng spah da kaba ïoh 59 run na ki 45 bol bad u Lakhan Lal u la ïoh 27 run na ki 18 bol. Katba u Pynkhrawbok Thaba bad u Wanbor Lamare ki la shim mar 2 wiket na ka bynta ka Nongpdeng. Ïa ka nam Player of the Match la ïohpdiang da u Sanjiv Ghosh.
Haba phai sha kawei pat ka jingïakhun kaba ar, ka Sportive Junior ka la pynliem noh ïa ka Acadimia Langsning da 99 run. Ka Sportive Junior kaba la shimti ban tied nyngkong ka la ïoh 259 run bad shah pynhap 2 wiket ha ki 20 over. Kane ka la wan urlong lyngba ka jingïalehkai bha u Digbijoy Roy (88 run na ki 33 bol) bad u Abhijeet Chanda (70 run na ki 45 bol). Katba u Mackie Blah u la shim 2 wiket na ka bynta ka Acadimia.
Haba wan beh ïa ka thong ba la buh da ka liang pyrshah, ka Acadimia Langsning ka la ïoh tang 160 run bad shah pynhap 4 wiket ha ki 20 over. U Shan Nongrum u la tied 52 run na ki 35 bol bad u Samelawan S. Nongkseh u la ïoh 47 run na ki 35 bol. Katba u Rohit D. Sangma bad u Kishan Das ki la shim mar shi wiket na ka bynta ka Sportive. Ïa ka nam Player of the Match la ïohpdiang da u Digbijiy Roy.
