Shillong, K’lyngkot 10
Ka Sorkar Jylla ha ka sngi Thohdieng ka la rai ban ai shuti kyrpang sa hynriew bnai na ka shuti ba ju ai sha ki nongtrei Sorkar kiba hap ban leit sumar ïa ki jingpang ba hap bujli dkhot met.
Haba kren hadien ka jingïalang ka Kynhun Myntri kaba la long ha Sohra ha ka sngi Thohdieng, u Myntri Rangbah, Conrad K Sangma, u la ong ba ka don ka rukom treikam ha ka Sorkar, haba ki nongtrei Sorkar ki don ha ka khep ba ki ïoh ïa ki jingpang ba jur, la ju ai shuti biang ïa ki, bad ka shong katkum ka jingjur jong ka jingpang.
U la ong ba nalor ka shuti kaba la don lypa, mynta ka Sorkar ka la rai ban ai shuti kyrpang sa hynriew bnai ïa kino-kino ki nongtrei Sorkar kiba pang bad hap ban leit bujli ïa ki dkhot met, ha kaba u la bynrap ruh ba kane ka long halor jong ka kyndon kaba la don ban shim shuti bad kam dei kaba treikam ïa baroh.
