Jowai, K’lyngkot 10
Kane ka jingaiti ïa kitei ki ‘cheque’ ka long mar T. 1 lak na ka bynta baroh 21 tylli ki Sports Club bad Association kiba don ha kane ka district.
U Myntri Rangbah ka Jylla, Conrad K. Sangma, ha ka sngi Thohdieng u la aiti ïa ki ‘cheque’ ba kot T.21 lak na ka bynta ban ai jingïarap sha ki synjuk ïalehkai jong ka West Jaiñtia Hills District khnang ba kin lah ban pyn-khreh ïalade na ka bynta ka 6th Meghalaya Games.
Ïa kine ki ‘cheque’ u Myntri Rangbah u la aiti ha ka jingïalang plie ïa ka jingrakhe dap 100 snem (Centenary Jubilee) jong ka shnong Chutwakhu, West Jaiñtia Hills District ha ka jingïadon lang u Symbud Myntri Rangbah Bah Snaiwbhalang Dhar, ki MLA kiba kynthup ïa u Bah Wailadmiki Shylla, Bah Lahkmen Rymbui nalor kiwei pat.
U Conrad u la pynpaw ruh ïa ka jingkmen ban ïohi ïa ka jingpynkhreh kaba dang ïaid shakhmat na ka bynta ka jingpynlong ïa ka Meghalaya Games ha Jowai, ïa kaba u la ong ba kan dei ka khyllipmat ka ban sah jingmynmaw ïa ka West Jaiñtia Hills.
U la ong ruh ba ka jingbei tyngka ha ki jingtei na ka bynta ki kam ïalehkai kam dei satia tang ka jingpynlut, hynrei ka dei ka jingpynlut pynsep na ka bynta ban plielad ïa ki samla kiba long ka lawei jong ka jylla.
