Shillong, K’lyngkot 10
U President ka Megha-laya Pradesh Congress Committee (MPCC), Bah Vincent H. Pala ha ka Sngi Thohdieng u la ong ba ïa ka kyrteng jong u Bah Micky Dauglas Syiem u ban ïa aireng ha ka ilekshon ban wan sha KHADC na Umroi konstitwensi la phah da ka Umroi Block Congress Committee.
“Ki la wan ki samla, ki Mahila bad ki la ïakynduh tangba ki ong ba kim hun, hynrei nga la ong ïa ki ba ym dei ma ngi na MPCC ba ai jingbthah ïa u kyrtong ha Umroi, hynrei dei ka Umroi Block kaba leit khot, dei ka Umroi Block bad ka Ri-Bhoi District kaba ai jingmut ïa ki kyrtong,” ong u Bah Pala.
Ha kajuh ka por, u la ong ba wat ha kiwei-kiwei ki konstitwensi, ki la bun kiba ‘phone’ hynrei dei ka Block kaba ai jingmut, kumjuh u nongpeit pyrman bad ka la shim por artaïew ban wad bniah mano ba i don jingkyrmen ban jop.
Na ka liang u President u la ong ruh ba kane ka ilekshon ban wan ka long kaba donkam eh ïa ka Congress, ha kajuh ka por ka dei ka lad ban jied ïa ki briew kiba kynsai tam na kiba ka seng ka don.
“Ngi la mad ïa ka jingshah ktah na ka jingphet seng ha kine ki por kiba la dep bad ban tei pynbha biang ïa kane, ngi hap ban trei shitom,” u la ong.
Halor ka jingkyrpad ïa ki nongtrei ka seng ban ïatreilang naba ka seng ka thmu ïa kaba bha, u Bah Pala u la kyrpad ïa ki paidbah ba kat kiba ka seng ka mut ban ai tiket, ka la wad bniah mano ba dei ban jop.
Ha shuwa, ki longkmie na Umroi konstitwensi ki la leit ban ïakynduh ïa une u heh nongïalam ka MPCC ban kyntu ba ka tiket ka dei ban leit beit sha u Bah Albinus Lyngdoh hadien ba ka MPCC ka la dep pyllait ïa ka thup kyrteng ba-ar jong ki kyrtong ban ïa aireng ha ka ilekshon ban wan sha KHADC bad JHADC.
