Shillong, K’lyngkot 10
Ka Shillong Lajong FC ka la wanphai da ka jingjop ha ka lympung ïalehkai I-League, hadien ba ka la lah ban pynliem noh ïa ka Real Kashmir FC da 1-0 kol ha ka sngi Thohdieng ha SSA Stadium, Shillong.
Kane ka nam jop ka la wan urlong lyngba ka shi kol ba la thep da u Aman Ahlawat na ka bynta ban pynlong ïa kane ka kynhun na ka nongbah ban khur ïa ki lai poiñ ha la ïing hadien ka jingshah rem ha u snem ba la dep ha ka Delhi da 3-1 kol.
Kane ka long ka jingjop kaba nyngkong ïa ka Lajong mynta u snem hadien ka jingsangeh ïalehkai shipor ban lehkmen ïa ka jingpdiang ïa u snem thymmai.
Te kumta naduh kaba sdang ka jingïalehkai baroh ki kynhun ki la pyrshang ban ïakhun tyngeh naduh kaba sdang ha kaba baroh ar tylli kynhun ki la ïoh ïa ki kabu kiba biang. Hadien shiteng kynta ka Lajong hapoh ka jingïa-lam u Jose Carlos Rodri-guez Hevia ka la ïoh ban pynkhih jar nyngkong eh lyngba u Aman.
Lyngba kane ka shi kol ka la nang pynïoh mynsiem ïa ki rangïalehkai ka Lajong ban ïakhun tyngeh kat haduh ba ka Real Kashmir kam shym la lah ban pynphai haduh kaba kut ka jingïalehkai jong ka kylla step.
Wat la kine ki kynhun ki la bteng ban ïakhun tyngeh ha ka kylla miet, hynrei baroh ar tylli ki la shem jingeh ban ïoh thep kol bad ha kaba kut ka Lajong ka la lah ban ïoh jingjop shisyndon.
Lyngba kane ka nam jop ka Lajong ka la jam ar kyrdan kata sha kaba hynñiew ryngkat 9 poiñ na ki hynñiew sien ïakhun, katba ka Real Kashmir (9 poiñ) ka la hiar sha ka kyrdan khyndai lyngba ka jingïapher kol.
Haba phai sha kawei pat ka jingïalehkai kaba la long kham ha shwa ha Goa, ka Inter Kashi ka la lah ban pynliem noh ïa ka Dempo da 1-0 kol na ka bynta ban bteng ïa ka jinglamkhmat ha kane ka lympung.
Kane ka nam jop ka la wan urlong lyngba u Joni Kauko (88) uba la thep shwa ban wai na ka bynta ban pynlong ïa katei ka kynhun ban ïoh 14 poiñ na ki hynñiew sien ïakhun bad kumjuh ban tam shi poiñ ïa ka Churchill Brothers kaba la hiar sha ka kyrdan ba-ar.
