Shillong, K’lyngkot 10
Ki Pulit ka Assam ki la kem noh ïa u Hanan Laskar uba dei u manager jong kawei ka krem dewïong thliew khnai ha Umrangso, hadien ka jingtwa bad shlei um katei ka par kaba la jia ha ka 6 tarik mynta Kyllalyngkot.
U Laskar u dei ba la thung da u trai ka par dewïong ban peit ïa ki nongbylla tih dewïong bad ban siew ïa ka bainong.
Kane ka jingkem ka la pyni ïa ka jingïaid shakhmat jong ka jingtohkit halor kane ka jingtwa ka par dewïong namar ba ka don ka jingbym shngaiñ jong ki nongtrei bad ka jingpynkheiñ ïa ki kyndon tih par.
Shwa kane ki pulit ki la kem ruh ïa u Punish Nunisa haba ïadei bad kane kajuh ka jingjia. Na ka liang ki pulit ki la register ïa ka ejahar hapoh ka Umrangso Police Station hapoh ka kyndon 3(5)/105 BNS bad kyndon 21(1) jong ka Mines and Minerals (Develop-ment and Regulation) Act, 1957.
Ka jingwad ïa ki nongtrei ba shah tap ha ka um ha kane ka par ka dang ïaid shakhmat. Haduh mynta, sa kumba 15 ngut ki nongtrei ki dang sahkut shapoh ka krem kaba la shlei da ka um.
Lah ban pynpaw hangne ba ha ka step jong ka 6 tarik mynta u bnai ym duna ïa 13 ngut ki nongtih dewïong la suba ba ki la sahkut bad shah taplup ha kawei ka par dewïong, kaba la shlei um ha Umrangso kaba hap ha ka District Dima Hasao jong ka Jylla Assam.
La ïathuh ba kane ka jingjia ka la jia ha krem dewïong No. 19 ha Tin Kilo kaba hap hapoh ka Umrangso Police Station. La ïathuh ruh ba ki don 27 ngut ki nongtih dewïong kiba la sahkut hapoh katei ka par dewïong, hynrei 10 ngut ki la lah ban phet katba kumba 13 haduh 17 ngut la suba ba ki la sahkut shapoh.
Katkum ki khubor ba la pyni la sakhi ba katei ka par dewïong ka duna ïa ki jingdonkam ba kongsan bad ha ki dur khih ba la ïasam bad ki bor Sorkar ki pynskhem ïa kine ki jingkynnoh. Ka jingbym don ki lad jingïada bad ka jingkynnoh ba ka jingtih dewïong ka long be-aiñ ka la pynjur ïa ka jingeh jong ka jinglong-jingman.
Ha ka 8 tarik mynta u bnai la ïoh ban sei tang ïa kawei ka met na katei ka par. Na ka liang ki bor Sorkar haduh mynta ki dang ïaleh katba lah ban pynstet ïa ki kam ban sei ïa ki lanot ba dang sahkut hapoh katei ka par.
