Nongstoiñ, K’lyngkot 10
Ki nongkitkam bapher-bapher naduh kiba hakhmat eh jong ka kynhun Independent ka Rambrai Constituency kiba la don bynta ban ïa trei shitrem ban pynjop ïa u MLA ha kane ka ilekshon ba dang shu dep ki la mih noh na kane ka kynhun bad ban leit ïasoh pat sha ka National People Party (NPP) Rambrai ha ka jingïalam jong u Bah Kimfa Marbanniang kum u President ha kajuh ka por kum u kyrtong MDC na ka seng NPP ha kane ka ilekshon ka ban sa long shen.
Ïa kane la ïohi ruh ha ka Sngi Thohdieng jong ka taïew hadien ba u Bah Kimfa Marbanniang kum u kyrtong MDC ka seng NPP u la ïoh ban pdiang burom ha ka jingïalang jong ka seng kaba la long ha Rambrai.
Ki nongkitkam ba hakhmat eh jong ka kynhun Independent kiba la leit ban rung sha ka NPP ki kynthup ïa u President ka kynhun Independent Rambrai, Bah Pynshlur L. Nonglyngkin, u Bah B.I. Nongsiej kum u Adviser, Bah Bhalanglin Kharlyngdoh, Vice-President bad kiwei-kiwei, kumjuh na kiwei pat ki seng kum na ka Congress, HSPDP.
U Bah Pynshlur L. Nonglyngkin haba kren ha katei ka jingïalang u la maitphang katto-katne halor ka jingseng ka jong ki ïa ka kynhun Independent na ka bynta ka ilekshon 2023, ha kaba u la ong ba la seng ïa kane ka kynhun da ka jingdonlang ki ‘riew rangbah kumba phra phew ngut eiei. Kawei ka thong kaba la buh hakhmat duh ka long ba la donkam kyrkieh ïa ki nongïalam na Rambrai ba kin don bynta noh bad ka Sorkar bad na kine ki phra phew ngut la pyntyllun ïa ka kam bad la poi sha ka thong ka jingjop.
U la ïathuh ruh ba ki la don kiwei ki seng naduh ka Congress, HSPDP ban ong ban ïa kyrshan ïa ki hynrei kumba ka long bad ka paw ki la pynshong nongrim ïa ki jingïakren bad ïakynduh ki jong ki, ki la shim ïa ka rai ba kam don jingmut ban leit rung sha ka HSPDP, Congress namar ha kaba khatduh ynda ki la jop ki poi sha ka NPP.
U Bah Kimfa Marbaniang pat haba kren ha kane ka jingïalang u la ong ba ha ka banyngkong ba u rai ban ïakhun ïa kane ka MDC haba la ïashong ïa ki jingïalang bapher-bapher, u sngewdap da ka jingsngewkhia bad ka jingsngew lynga ha ka mynsiem.
“Ka jingsngewkhia ka long hadien ba ngi la rem ha ka ilekshon ha u 2023, ka wan kata ka jingmut jingpyrkhat ha nga , lada ngan ïaid beit ha kane ka ilekshon MDC kan long kumno, mynnin ha u 2023 u paidbah u dang kyntait tip kan long shuh kumno hynrei ka jingwan jong phi ha kane ka sngi ka ai mynsiem ïa nga, nga dap da ka jingsyaid ban ïakynduh lang ïa phi sa shisien khamtam ïa kito kiba la shim ka rai ban mih noh na kiwei ki seng ban ai ka jingkyrshan kaba pura ïa nga ha kane ka kynti,” ong u Bah Kimfa.
U Bah Kimfa u la kyntu ruh ïa ki paidbah nongkyrshan ba kin ïa trei shitrem ha kane ka kynti khnang ba kan long ruh ka nuksa ym tang hapoh ka Constituency hynrei ïa kiwei-kiwei ki Constituency kiba ïakhun ïa kane ka MDC sha ka KHADC.
