Kohima, Kyllalyngkot:
Ka Tenyimi Union Nagaland (TUN), ka Apex Body jong ki san tylli ki jaitbynriew ba bun ha Nagaland, ka la pyrshah ïa ka rai jong ka sorkar kmie ban ker kynroh ïa ka khappud Indo-Myanmar, da kaba kam ba kan don ka jingktah kaba “shyrkhei” ïa ki jaitbynriew Naga, ïa ka jingim jong ki bad ki jingïadei ha ka kolshor jong ki.
Ka TUN ka dei ka Apex Body ne ka kynhun bahrh jong ki san tylli ki jaitbynriew kiba kynthup ïa ka Angami, Chakhesang, Pochury, Rengma bad Zeliang.
Ka la kynnoh ba ka jingker kynroh ïa u pud u sam jong ka Indo-Myanmar kan pynthut ïa ka jingim ha ka liang ka ïoh ka kot, kan pynkyrpang ïa ki jaidbynriew, kan pynpra ïa ki jingïadei kiba kongsan, bad kan khanglad ïa ka jingïoh ïa ka jingpule bad ka jingsumar pang.
“Ka jingker kam dei tang ka jingkhanglad ha ka met, ka dei ka jingthombor ïa ka jinglong, ka pateng, bad ka burom jong ngi,” la ong u President ka TUN u Kekhwengulo Lea ha ka jingpynbna khubor ba la pynmih.
Ka la kyntu ïa ka sorkar kmie ban pyrkhat biang ïa ka rai ban ker kynroh ïa u pud Indo-Myanmar, da kaba ban jur ïa ka jingdonkam ban ïada ïa ki jaka jong ki kpa tymmen bad ban pynneh ïa ka hok bad ka burom jong ka jaitbynriew Naga.
