Shillong, K’lyngkot 10
Kumba san ngut na Meghalaya ki la shah jied ban leit sakhi ïa ka Republic Day Parade ha Kartavya Path ka ban long ha ka 26 tarik mynta u Kyllalyngkot.
Kine ki long shibynta ka kynhun kaba kyrpang kaba kynthup 35 ngut ki nongmihkhmat na ka Thaiñ Shatei Lam Mihngi, kiba pyni ïa ka jingnoh synñiang kane ka thaiñ sha ka jingthmu na ka bynta ka Swarnim Bharat.
Ha kane ka jingleit jong ki, kine ki nongshah khot kyrpang kin sakhi ïa ka Republic Day Parade bad kin leit jngoh ruh ïa ki jaka ba kyrpang kum ka National War Memorial bad ka PM Sangrahalay. Nangta, kin ïoh ruh ban ïakren bad ki Myntri Sorkar Pdeng ka ban pynïar ïa ka jingsngewthuh jong ki ïa ka hiar pateng jong ka India bad ki sienjam ba dang pyntreikam jong ka Sorkar.
Haduh 10,000 ngut ki briew ki la shah khot kyrpang na kylleng ka ri ban sakhi ïa ka Republic Day Parade 2025 ha Kartavya Path, New Delhi, ha ka 26 tarik u Kyllalyngkot, 2025.
Napdeng kine, 35 ngut ki briew na ka thaiñ shatei lam Mihngi ba kynthup 8 ngut na Assam, 22 ngut na Sikkim bad 5 ngut na Meghalaya kiba la shah jied kum ki nongmihkhmat namar ka jingnoh synñiang ka thaiñ na ka bynta ka Swarnim Bharat.
Kine ki briew kiba la shah khot kyrpang ki kynthup ïa ki longkmie kiba seng kam lajong, ki nongjop National Award bad ki nongïoh jingmyntoi na ki skhim kyrpang jong ka Sorkar Pdeng.
La peit bniah ban khot kyrpang ïa ki dkhot jong ki Self-Help Group (SHG) kiba trei ha ki kam kiba ïadei bad ka jingpynmih ïa ki lad kamai jakpoh, ka jingïada ïa ka mariang, ka koit ka khiah, ka jingïoh ïa ka bam kaba tei, ka jingkhuid, ka jingpynïasoh ïa ki kynhun Panchayati Raj, bad ka jingpynkupbor ïa ki kynthei. La peit bniah ruh ban khot ïa kito ki briew ki bym pat ju poi sha Delhi.
