Jowai, K’lyngkot 12
Hadien hynriew snem ba u Ma Madonbai Rymbai, CEM barim ka JHADC bad u nongïalam barim u la wan phai biang sha ka Congress, u la shim ïa ka lyngkor ban pynkhie biang ïa ka seng ha Jowai ba bun na ki paid nongkyrshan ki la sakma namar ka jingbym don ïa ki nongïalam ban kit ban bah ïa ka kam.
Kane ka la wan jia long ruh hadien ba ki heh nongïalam ka Congress ki la pdiang ïa u ban long kum u kyrtong MDC sha ka Jaiñtia Hills Autonomous District Council ban aireng na ka 4 Amwi-Khliehtyrshi.
Ka ilekshon sha ar tylli ki ADC; ka KHADC bad JHADC kan long ha ka 21 tarik Rymphang.
Kumta sa shisien ban tehsong biang ïa ki nongkyrshan ka Congress jong ka 2-Jowai Block Congress Committee la jied ïa u Ma Madonbai kum u President nalor u kyrtong ka Mukhla Ummulong u Bitos Sari kum u Vice President.
Ïa ka kam General Secretary la jied ïa u Teiwanza Challam, Assistant Secretary Embhamiki Langbang bad Treasurer Esterwis Ryngkhlem nalor kiwei kiwei ki dkhot na kylleng ki unit bad la pdiang bad pynskhem ïa kine ki nongïalam da ka MPCC ha ka 8 tarik Kyllalyngkot.
Haba kren bad ki nongthoh khubor ha ka 10 tarik Kyllalyngkot ha ka jingdonlang u MDC ba mynta bad kyrtong na Jowai South Ma Saron Pasweth, u Ma Madonbai Rymbai u la ong hadien hynriew snem ba u la shong bishar ïa ka jinglong jingman ka saiñpyrthei, u la rai ban wanphai biang sha ka Congress ban shim ïa kane ka lyngkor ban pynkhie im ïa ka seng bad ban pynlum pynlang ïa ki nongkyrshan kiba la sakma bad saphret kylleng namar ka jingbym don shuh ki nongïalam.
U la ong ba ka Jowai ka dei ka konstitwensi kaba don burom kaba ki paid nongshong shnong ki la ai ka jingkyrshan kaba pura ïa ka Congress ha ki bun bun snem bad wat ha ka ilekshon MP kaba dang shen ruh la sakhi ba ki paidbah ki ai ka muhor ksiar jong ki sha ka seng, kaba pyni shai ba ka seng ka donkam ïa ki nongïalam ban btin lynti ïa ki paidbah.
Kum u kyrtong ban aireng ha ka ilekshon, u la ong, “Ka Congress mynta ka kynti ka don ïa ka jingkyrmen ba kan jop la kumno-kumno 15 lane 16 seat na JHADC, bad ka daw ka long ba ki paidbah nongkyrshan ki la ngiah ïa ka NPP kaba ym lah satia ban pynïaid beit ïa ka synshar- khadar kaba la ktah ïa ki nongtrei ka council bad duh tulop la palat shisnem, bad bynrap “Kane ka jia long namar ba lait rud ka khajna shabar ka pla tyngka.”
U la kynthoh ruh ïa ka jingai wai ka JHADC ïa ka Forest Beat House ha Mookyndur bad Ratacherra kaba ktah ïa ka ïarong pisa ka council bad ong ba ha ka jingshisha kine ki khyrdop jong ka Forest dei ban peit ban tem ïa ka jinglait ka khajna na ki mar khlaw bad mar poh khyndew, pynban la ai wai ka ban ktah jur ïa ka council.
Kumta lada ka Congress ka wan ha ka bor, kan pynbha ïa ka rukom synshar-khadar bad ban ïakhun ban khang lad ïa ka jinglait rud ka khajna bad ban thaw ki lad ban pynjem ïa ka jinghiran ka pla pisa ka council.
