Shillong, K’lyngkot 12
U MLA ka BJP na Madhya Pradesh, u Rajendra Verma, u la ïoh ban leit pyllait noh ïa ki ar ngut ki samla kynthei kiba dei na rilum Jaiñtia haba ki la poi sha Tapeshwari Bagh Colony, Indore kaba dei ka sor jong ka jylla Madhya Pradesh.
Ka jingpoi kine ki samla kynthei sha Indore ka dei namar kiba tyrwa ban aikam na Guwahati, Assam haba ki la ïalam sha katei ka jylla ki la phah ïa ki ha ka kam ban khem met kaba khot ‘Spa’, kumta kim sngewïahap ïa kane ka jingthok jong ki nongaikam bad ki la pyntip sha ki bahaïing ha Meghalaya.
Kumta na ka liang ki bahaïing haba wad jingïarap ki la ïoh ban ïakren bad u Bah Marvel Sungoh uba dei u samla Khasi uba trei ha My Home India kaba don ha nongbah Delhi.
Haba ïoh ban ïakren bad u Bah Sungoh lyngba ka phone u la ïathuh ba ki don bun ngut ki samla kynthei na Meghalaya kiba leit shah hikai ban long nongpynbhabriew ne ‘beautician’ ha Guwahati.
U la ïathuh hadien ba ki la dep shah hikai, ki briew na Guwahati ki la phah ïa kine ki samla na Meghalaya sha kylleng ki jylla ha la ki jong ki kam ba ki dei ban trei.
“Kine ki ar ngut ki samla kynthei na Jaiñtia ki la poi sha Tapeshwari Bagh Colony, Indore kaba dei ka jylla Madhya Pradesh ha kaba ki nongaikam ki la phah ïa ki ban long nongkhem met, dei na kane ka daw ki la kyntait hynrei kine ki nongaikam kim shym la sngap,” u la ong.
Shuh-shuh, u la ïathuh haba kim sngew lah shah shuh ki la pyntip sha ki bahaïing bad ki bahaïing ki la ïoh ban ïakren bad u.
“Ha ka jingïakren bad nga, na ka liang ka My Home India ka la ïoh ban pan jingïarap na u MLA ka BJP na Madhya Pradesh uba kyrteng u Rajendra Verma uba la lah ban leit sei ïa kine na ka ïing ba ki sah,” u la ong.
U Bah Sungoh u la ïathuh ba kine ki samla ki la mih na jaka sah ha ka por 2:00 baje mynstep jong ka Sngi Saitjaiñ khlem da pyntip ïa ki trai kiba ai kam bad la phah shong ïa ki da ka liengsuiñ sha Delhi bad ha ka Sngi U Blei la ïoh ban pynpoi ïa ki sha Guwahati bad mynta kine baroh ar ngut ki la poi sha la ïing.
Kumta u la kyntu ïa ki samla ba ki dei ban da pynthikna bha ïa ka kam ba ki trei shwa ban mih na jylla khnang ban ym buh jingeh ïa ki bad bahaïing, namar kawei na kine ar ngut ki samla kynthei ka wan na ka longïing baduk kat haduh ba ka hynmen jong ka, ka hap ban shim ram ban ïoh thied tiket liengsuiñ tang ba kan poi sha shnong.
