Shillong, K’lyngkot 12
Ka ‘National Youth Day’ kaba 41, ka jingkynmaw burom ïa ka lyngkhuh sngikha jong u Swami Vivekananda, la rakhe ha Ramakrishna Mission Vivekananda Cultural Centre, Shillong mynta ka sngi.
U Swami Hitakamanandaji Maharaj, Secretary, Ramakrishna Mission, Shillong, u la plie ïa ka jingïalang kum kongsan. Ki kynrem ki lyndan na ka Nehru Yuva Kendra bad kiwei-kiwei ki la ïadonlang ha kane ka sngi.
La sdang ïa ka prokram da ka jingbuh syntiew ha u mot dur jong u Swami Vivekananda, bud pat sa ka jingthang ïa ka sharak bad ka jingpyndonkam ïa ka Swadesh Mantra jong u Swami Vivekananda. La don ka jingrwai Khasi kaba sngewtynnad ba la ai na ka bynta u Swamiji da ki samla pule jong ka Ramakrishna Mission Students’ Home.
Ha ka jingpdiang sngewbha ïa ki briew ba shah khot kyrpang, u Swami Vedeshananda, Director, Vivekananda Cultural Centre, u la ïasam ïa ki khana ba ai mynsiem shaphang ka jingim jong u Swami Vivekananda, ba kynthup ka jingkha ba kyntang jong u, ka jingim jong u kaba bun ki kam, ka por jong u ba u don ha Shillong, bad ka jingieid jong u ïa la ki para ri.
U Director u la pynshlur ïa ki nongïashim bynta ha kane ka prokram ban peit bniah ïa ka jingim bad ki kam jong u Swamiji ban ïoh shuh-shuh ka jingsngewthuh kaba kham jylliew shaphang ka deiriti jong ka ri bad ka jingïar jong ka, bad ban sdang ïa ka jingïaid lynti jong ka jingshem ïalade.
U Swami Hitakamananda, ha ka jingai jingkren, u la ban jur ïa ka jingkongsan ban ‘jingai jinghikai kaba tei ïa ki briew bad kaba hikai ïa ki ban long ki briew kiba bha’ kumba la thmu da u Swami Vivekananda: “ka jingim kaba im bad ka jingshisha, ka jingkhuid, bad ka jingbym khwan myntoi.
U la batai shaphang ka jingkren jong u Swami Vivekananda, “Ka jinglong khuid, ka jingïai shah, bad ka jingkut jingmut ki long ki lai tylli kiba kongsan na ka bynta ka jingjop, bad na kane baroh kaba kongsan ka dei ka jingieid,” u la ban jur ïa ka jingkongsan ban don ïa kine ki jinglong ha ka jingim ba man ka sngi.
U Swami Hitakamananda u la kyntu ïa ki samla ban pdiang ïa kine ki jinglong bad bud ïa kine ki nuksa bad pyrshang ban trei bha ha baroh ki kam.
Hadien kane ka la don ka prokram deiriti, ba kynthup ïa ki prokram na ki samla pule jong ka Sanskriti and Vivekananda Youth Forum. Ka prokram ka kynthup ïa ki jingrwai kiba sngewtynnad, ka jingpyni ïa ka jingleh ‘Yoga’, bad ka jingpyni ïa ka ‘Geeti Alekhya’ – ka jingpynïasoh ïa ka jingpyni ïa ka jingim jong u Swami bad ki sur jingrwai kiba sngewtynnad.
La pynkut ïa ka jingïalang da ka jingai jingkren na u Divyaswarupanandaji Maharaj, Assistant Secretary, Ramakrishna Mission Shillong ha kaba u la kyntu ïa ki samla ban ïoh mynsiem na ki ktien bad ki jingai jinghikai jong u Swami Vivekananda bad ban noh synñiang sha ka kam ban tei ïa ka ri.
