Shillong, K’Lyngkot 12
Ka khubor kaba sngewtynnad bad ka ban pynkmen ïa u paidbah baieit bad sngewtynnad bha ïa ka kynjatbol ka long ba na ka liang ka All India Football Federation (AIFF) ka la tyrwa sha ka Meghalaya Football Association ba kan pynlong ïa ki artylli ki jingïalehkai hangne ha nongbah Shillong, katta ha Jawaharlal Nehru Sports Complex, Polo.
Kine ar tylli ki jingïalehkai kiba ka AIFF ka la tyrwa sha ka MFA ka long ba ha ka 19 ne ka 20 tarik u Lber mynta ka snem kan don shwa ka jingïalehkai paralok (international friendly match) hapdeng ka India pyrshah ïa ka Maldives.
Hadien kane, yn bynrap pat da ka jingïakhun kaba dei jong ka lympung AFC Asian Qualifying Round, ha kaba ka India kan khreh ba kan aireng ïa kawei pat ka ri kaba ka jylla Meghalaya ka ïajan bha ruh bad ka, katta ka Bangladesh. Kane ka jingïakhun la buh ba kan long ha ka 25 tarik jong u bnai Lber mynta ka snem.
Haba ïadei bad kane, mynta ka sngi, ka la don ka jingwan ban jurip da u Akshay Rohatogi uba dei u Head of Competition ryngkat bad u Abhishek Yadav uba bat kum u Deputy General Secretary ka AIFF, ïa baroh ki bynta jong ka JN Stadium, Polo.
Haba ïakren bad u president ka MFA u bah Hamletson Dohling, u ïathuh ba ïa kane ka jingtyrwa ka AIFF ka la wan lyngba ha u a u president ka synjuk katta u Kalyan Chaubey, haba u bah Hamletson u la pynpaw ba na ka liang ka jong u, u la jubab ba mar-mar yn nym lah ban ong hooid ne em, hynrei u la pynpaw ha u Chaubey, ba un rah ïa kane ka khubor ban pynsngew shwa sha ka sorkar jylla.
Hadien kane u bah Hamletson u la pynpaw pat ïa ka jingsngew kmen ba ynda haba u la ïoh ban pynsngew ïa kane ka khubor, ka sorkar ka la mynjur ba kan ïadon bynta lang bad ka MFA lem bad ka AIFF ban ïadon bynta ha kaban pynlong ïa kine ki artylli ki jingïakhun.
Hadien kane ka jingwan kine ki briew ka AIFF, la 20 tarik mynta u bnai, kan don sa ka jingwan jurip jong ki briew kiba dei napoh ka Asian Football Confederation ne ka AFC, ha kaba ka rai kut ba ka nongbah Shillong kan ïoh ba kan pynlong ïa kine ki lympung kan dei lyngba kane ka jingjurip.
Kum u nongïalam ka MFA, bah Hamletson u kyrmen ba kiei-kiei baroh kin ïaid beit kumba la thmu, katno tam lei-lei ba ka jylla ha ka sien kaba nyngkong kan ïoh ïa kat kane ka nam bad ka burom ban pynlong ïa kine ki artylli ki jingïakhun hangne hapoh ka nongbah.
