Washington, K’lyngkot:
Ka Iingbishar ba haklieh-duh jong ka United States, ha ka Sngi Thohdieng la ong ba ka la pynsngap ia ka mat ba iadei halor ka jingtyrwa ban khang noh shisyndon ia ka App ‘TikTok’ hapoh ka ri bad kaba lah ruh ban pynlong ia ki trai jong katei ka app na China ba kin hap ban die noh ia katei ka rynsan ‘Social Media’ lane ki lah ruh ban hap ban sangeh pyntreikam lane ban khang noh shisyndon ia ka.
Namar la ong ba ka ïingbishar ka dang pyn-ap ban ioh pynsngap bad ban bishar halor katei ka mat kaba la wanrah jing artatien na ka tnat ïada ri namar ka jingbym sngew shngaiñ ioh ka China kan pyndonkam ia katei ka app tang ban ioh tih bniah bad ban ioh syntiat ia ka jinglong-jingman ha US.
Ia ka aiñ ban khang noh ia katei ka app, la soi da u Biden ha u Iaiong jong u snem 2024, ha kaba katei ka aiñ kan long ban khang pyrshah ia ki nongpyniaid jong katei ka rynsan paidbah bad ia baroh ki kam jong katei ka rynsan hapoh ka ri.
Namar ka US ka la ju kynnoh ruh na ka por- sha ka por ba ka China ka ialeh ban syntiat ia ka jinglong-jingman ha US lyngba jong katei ka rynsan paidbah kaba ki khynnah-samla jong ka ri ki ju pyndonkam bha.
Hynrei, na ka liang ki trai bad ki nongpyniaid jong katei ka rynsan ‘TikTok’, ki la kyntait ia katei ka jingkynnoh jong ka US ba katei ka rynsan ka iatreilang bad ka tnat syntiat jong ka China ban ioh syntiat ia ka jing-long-jingman ha US.
Namarkata, baroh arliang ki la shu ap tang ia ka jingbishar na ka ïingbishar ba hakhieh duh jong ka ri, ba kin ioh ban pynshisha ia ka jingkdew kti bad ka jingkynnoh hapdeng jong ki baroh arliang.
Kumta ruh la ong ba kane ka jingphah khang noh ia katei ka rynsan, ka lah ban ktah jur ruh ia ka jinglong-jingman bad ka jingiadei hapdeng jong ka US bad ka China shwa ba u Donald Trump un bam smai kum u President bathymmai ka United States ha ka 20 tarik u Kyllalyngkot 2025.
