Shillong, K’lyngkot 13
Ka Khasi Hills Autonomous District Council (KHADC) ka dei ban leh eiei noh pyrshah ïa ki ophisar kiba donkti ha ka ban pynslem bad pynkhreh ïa ka jingkheiñ jingdiah kaba man la u snem.
Ïa kane la pyni ha ka kaiphod Comptroller and Auditor General of India (CAG).
Ka CAG ka la ong ruh ba dei ban pynbun ïa ki briew kiba trei da kaba shah hikai pyntbit na ka Jylla ha ryngkat ka jingïatreilang bad ka tnat District Council Affairs. Namar ka jingslem ban pynkhreh ïa ka jingkheiñ jingdiah, nalor ka jingbym biang ki jingbatai ha ka liang ka pisa tyngka, ka jingbiang ha ka rukom pyndonkam ïa ki jingïoh ym shym la lah satia ban ai jingkheiñ, la ong ka kaiphod CAG. Ka kaiphod CAG ka la ai jingmut ba ka Council ka dei ban pyntikna ba ka jingphah ïa ki jingkheiñ jingdiah man la u snem sha u Principal Accountant General kham kloi bad don ka jingbuh por.
