I-League: Jam ka Lajong sha kyrdan basaw naba pynliem ïa ka Bengaluru

Hapdeng kane ka jingïakhun ka Lajong ka la ïoh ban pynkhih jar nyngkong eh lyngba u rangïalehkai na Brazil, u Daniel Goncalves ha ka minit kaba 40.

Shillong, K’lyngkot 13

Ka Shillong Lajong FC ka la bteng biang ïa ka jingjop ha ka lympung ïalehkai I-League 2024-25 hadien ba ka la lah ban pynjem khnap ïa ka kynhun kaba dang shu kiew kyrdan thymmai, ka Sporting Club Bengaluru haduh 5-0 kol ha ka Lah Sngi U Blei.

U rangïalehkai shakhmat na Brazil, u Douglas Tardin u la ïoh hat-trick na ka bynta ban pynlong ïa ka Lajong ban jam sha ka kyrdan basaw ryngkat 12 point na ki phra sien ïakhun. Kane ka long ka jingjop ba ar mynta u snem ha ki ar tylli ki jingïalehkai ha la ïing bad kham ha shwa ka la lah ban pynliem ïa ka Real Kashmir da 1-0 kol.

Haba phai sha kane ka jingïakhun, ka Lajong hapoh ka jingïalam u Jose Carlos Rodriguez Hevia ka la lah ban ïalehkai bha naduh kaba sdang, kumjuh ka liang pyrshah kaba pyrshang ban ïakhun tyngeh wat la ka dang dei ka kynhun kaba thymmai ha kane ka lympung.

Hapdeng kane ka jingïakhun ka Lajong ka la ïoh ban pynkhih jar nyngkong eh lyngba u rangïalehkai na Brazil, u Daniel Goncalves ha ka minit kaba 40. Ha shwa ban kut ka jingïalehkai jong ka kylla step, ka Lajong ka la pynbud biang ïa ka kol ba ar lyngba u Figo Syndai (45+2) na ka bynta ban tam da 2-0 kol.         

Hadien katto-katne por ba la bteng ïa ka jingïakhun jong ka kylla miet, ka Lajong ka la ïakhun tyngeh shuh shuh ha kaba kam shym la ailad ïa ka liang pyrshah ban pynphai. Dei ha ka minit kaba 60 ba ka la thep biang ïa ka kol ba lai lyngba u Douglas Tardin. Une u rangïalehkai shakhmat u la thep biang sa ar kol (67 & 75) na ka bynta ban ïoh shisyndon ïa ka hat-trick. Kane ka jinglah ban thep kol ka la pynlong ïa ka SC Bengaluru ban duh mynsiem ha ka rukom ïalehkai bad ha kaba kut ka la mad ïa ka jingshah rem kaba san ha kane ka lympung.

Lyngba kane ka jingjop, ka Lajong ka dang duna sa 4 point ïa ka Churchill Brothers (16 point), kaba dang lamkhmat ha kane ka lympung bad sa 2 point ïa ka Namdhari (14 point) bad ka Inter Kashi (14 point), kiba la don ha ka kyrdan ba-ar bad balai. Te kumta ka Lajong ka dang donkam ban ïalehkai bha ha ki jingïakhun kiba dangsah bad ha ka jingïalehkai ka ban wan kan long shabar na la ïing pyrshah ïa ka Sreenidi Deccan ha ka 18 tarik ka ban long ha Deccan Arena Football Stadium ha Hyderabad.