Shillong, K’lyngkot 13
Ki paidbah nongthep vote ka Mawphlang-Diengïei Konstitwensi ki la pynpaw ba ka jingai tiket jong ka Congress ha kaba ïadei bad ka Mawphlang-Diengïei kam dei kaba bakla bad kaba leh donbor da mano-re-mano, hynrei ka dei kaba biang eh hapoh ka jingpynïaid bad ka jingïalam jong ka seng.
Ki paidbah ki la ong baroh shikatta hadien ka jingphet seng noh jong u MDC barim ka konstitwensi, u Bah Lamphrang Blah, kim ithuh-ithaw shuh ïa ka jingtreikam hapoh ka Mawphlang Block Congress lane Unit, kumta ka pynlong ïa ki ba kin hap ban kyrshan noh ïa kiwei pat ki seng ha kaba ki la hap ban peit noh ïa u briew ym shuh ïa ka seng.
“Hynrei kaba sngewtynnad ka long ba hadien ba ngi la ïoh jingtip ba u Bah George Sun uba long u khun jong u Bah JA Lyngdoh (Myntri Sorkar barim) lem bad ar ngut kiwei pat, kiba la pan ïa ka tiket na ka Congress ka mynsiem jong ngi ki paidbah ka la phaikhmat beit sha u Bah George Sun namar ngi la ïohi ïa ki kam jong u kpa jong u ha ki por mynshwa bad kumjuh ruh u khun wat la um pat dei uei-uei hynrei u la pyni bun ki kam hapoh ka konstitwensi baroh kawei”, pynpaw kitei ki paidbah.
Shuh-shuh, ki paidbah ki la pynpaw ba u Bah George Sun wat la u dang dei u bathymmai hapoh ka kam saiñ pyrthei hynrei u don ïa ka mynsiem ban shakri ïa ki paidbah ha ki 3 snem mynshwa bad haduh kine ki sngi.
“U Bah George u dei uba dang thymmai ha ka kam saiñpyrthei ym kum kiwei pat kiba la kynjih na uwei u mawsiang sha uwei pat bad haba ka sngi kam pynsyiad shuh ïa ki, ki sdang ban kynjih noh sa sha uwei pat u mawsiang”, bynrap ki paidbah.
Ki la ong ruh ba ka jingmih ka jingong ba u Bah George Sun u dei nabar ka konstitwensi ka dei tang ka jingkren khyllung-khynnah jong ki katto-katne namar baroh ki ïohi bad ki tip ba u dei u trai shnong napoh ka shnong Marbisu hynrei u shong u sah sha Shillong.
“Ha u briew u ba trei lada u sah shano-shano ruh, ka jingtreikam kam ju phiel ha konstitwensi hynrei kaba sngewsih ka long ïoh ba kine kiba kam ba ki dei napoh ka konstitwensi, ynda ki la ïoh ïa ka jingjop, ki poi thied jaka-thied ïing sha Shillong bad wat tang ban kynduh ïa u paidbah ruh kim lait por shuh bad haba kumta sa ïano pat ngin kynnoh”, ong ki paidbah ka Mawphlang-Diengïei konstitwensi.
