Shillong, K’lyngkot 13
U Myntri ka tnat Border Ares Development, Rakkam A Sangma, u la ong ba ka jingpynbeit pud hapdeng ka Meghalaya bad Assam kan ïaid, hynrei ka jingïadei para briew ka dei ban long da kawei ka rukom.
“Kam don pat da kawei ka rukom pynbeit pud ban ïa ka jingïadei para briew. Nga sngew ba ha ka jingïadei para briew, kam don pud kam don sam, wat la u pud u sam ïa ka khyndew u don”, u la ong.
U la ong ba ki ar Jylla (Meghalaya bad Assam) ki dei ban pynïaid shakhmat ban pynbeit ïa u pud u sam ba dang sah ha ka kylla kaba ar na ka bynta hynriew tylli ki jaka ha khappud, kumba ki la dep ban ïa pynbeit ha ki hynriew tylli ki jaka ha ka kylla ba nyngkong ha ki snem ba la leit.
U Rakkam u la kubur ba ka jingïakren pynbeit pud ka la sangeh shwa mynta shi por, namar kiba bun ki daw, khamtam ba ha Meghalaya ka don ka jingpynkhreh ïa ka ilekshon, hynrei u la bynrap ba ka Sorkar hapoh ka jingïalam u Myntri Rangbah, Conrad K Sangma ka la kut jingmut pat ban pynbeit ïa kane ka jingeh. U la ong ba ki Regional Committee ki dang pynkhreh shaid-shaid mynta ïa ki kaiphot ban lah aiti noh sha ka Sorkar na ka bynta ban pynïaid shakhmat ka jingpynbeit pud ïa ki hynriew tylli ki jaka ba dang sah ha ka kylla kaba ar.
“Hooid, ka don shisha ka jingeh, hynrei kum u Myntri nga kwah ban kyrpad ïa ki paidbah nongshong shnong ha khappud, da kaba burom ïa ki mat ba phi don, ka long kaba donkam ban don ka jingïadei para briew, da kaba shong ba sah lang hapdeng ka jingsuk jingkmen, namar kam don da kawei pat kaba lah ban pynbeit ïa u pud kaba kham bha ban ïa kata”, la ong u Rakkam.
Ha kawei ka liang u Myntri ba khmih ïa ka bha ka miat ha khappud, u la ïathuh ba ka Sorkar Jylla ka la ju ïoh pisa na ka Sorkar Pdeng ban pyntreikam ïa ki skhim pynroi ha khappud, hynrei mynta la kumba 3-4 snem kane ka jingai pisa ka la sangeh noh, bad mynta ka Sorkar Jylla ka la pyrshang na ka skhim lajong ban ïarap ïa ki paidbah ha khappud ha ka liang ki kam pynroi.
“Mynshwa ngi ju ïoh ïa ka mang pisa na ka Sorkar India, hynrei ha kine 3-4 snem la pynsangeh noh, ngam tip bha la kin sdang biang naduh mynta u snem ne em, ngi dang ap ïa ka jingpyntip. Hooid, na ka liang ka Sorkar Jylla, wat la ka jingmang pisa ka duna, hynrei ngi leh ïa ki projek barit-barit kiba dei ki kam pynroi”, la ong u Rakkam.
