Shillong, K’lyngkot 13
Halor ka jingpynkhreh biang ban shah jied ha ka ilekshon MDC sha Khasi Hills Autonomous District Council ka ban long ha ka 21 tarik u Rymphang, 2025, u Bah Lambor kum u MDC ba dang don ha ka shuki u la ong ba ka jingpynkhreh ka dei man la ka sngi ym shisien san snem.
U la ong ba un ïakhun kum u kyrtong khlem seng bad khmih lynti ba u paidbah kane ka Konstitwensi un ai biang ka jingkyrshan bad ka jingshaniah ban bteng ka jingshakri.
Halor ka jingïakren ba ki kyrtong khlem seng ki dei tang ki ban kylla sha kiwei pat ki seng hadien ka jingmih (result) na ka ilekshon, u Bah Lambor u la ong ba wat ka Election Commission of India ka ithuh ïa ki kyrtong khlem seng bad kum kine ki jingkynnoh ki dei tang ban ïalam bakla ïa u paidbah bad ha ka ilekshon ha Ri Lum Khasi bad Jaiñtia hi ki peit ïa u briew ym ïa ka seng bad ha Nongkrem hi donkam da ka jingieid bad jingshaniah ym ka bor pisa.
U la ong ba ka rai ïakhun ïa ka ilekshon MDC kum u kyrtong khlem seng hadien ba u la shah rem ïa ka ilekshon MLA 2023 na ka United Democratic Party ka dei kaba la shim da ka jingïakren bad ïa phylliew jingmut bad ki nongkyrshan.
U la ong ba um shim sting ïa kiba ïakhun ha ka ilekshon bad bynrap ba ha ka samoi treikam ka ban sa kut jong ka KHADC, kum ka Council ka la wanrah ïa ki aiñ ban pynkup-bor ïa ki dorbar shnong, ki longkmie bad ki samla.
