Imphal, Kyllalyngkot:
U Myntri Rangbah ka Manipur u N Biren u la khot ïa ka jingïatreilang bad ka jingïashim bynta kaba radbah jong ki nongïalam Balang, ki Sengbhalang (CSO), ki jaitbynriew trai ri trai muluk bad kiba la ithuh ha ka ban pynphai biang ïa ka jingsuk bad jinglong ba man ka sngi ha ka Jylla, da kaba khring na ka bynta ba la leh da ka Committee of Peace and Integrity (COPAI) ha ki snem 1990.
Ha kane ka sngi, u Myntri Rangbah ka jylla u la plie ïa ki katto-katne tylli ki projek bad u la buh ïa ki mawnongrim na ka bynta kiba thymmai ha ka jingïalang kaba 42 jong ka Maralui Karalimei Swijoikang (Maram Students’ Union), kaba la long ha madan N Raisung, Maram Bazar, Senapati. Ïa kane ka jingïalang la buh ïa ka phang “Sha ka Imlang Sahlang kaba la kylla.”
U N Biren u la plie ïa ka Multipurpose Rural Development Centre ha Maram Khullen bad u la buh ïa ki maw nongrim na ka bynta katto-katne tylli ki projek ba kongsan, ba kynthup ïa ka jingshna ïa ka lynti ïaid kjat kaba skhem ha ka Headquarter jong ka Senapati distrik, ki hostel jong ki khynnah shynrang bad kynthei riewlum ha Maram, ka jaka jngohkai pyrthei ha ka thaiñ Maram, Meeyamgi Shanglen (Multipurpose Indoor Hall), ki madan ïalehkai ki madan kiba don ki Gallery ha Maram bad ha Punanamei, ka ophis jong u SDO Lairouching, bad ki jingtei na ka bynta ka CHC Maram, PHC Maram Khullen, bad ka jaka treikam jong ki pulit kaba don ha Maram.
Kum u kongsan, u Myntri Rangbah ka jylla N Biren Singh u la ai jingkren ha katei ka jingïalang, da kaba pynpaw ba ka jingïajan hapdeng ki paidbah ka Maram bad ki para marjan marpa jong ki, kumjuh ruh kito kiba wan na ki jaka ba jngai, ka la don naduh ki por ba mynshwa.
U la pynpaw ruh ïa ka jingkmen haba u la sakhi ïa ka jinglong ryntih jong ki samla pule, kiba aiti lut ha la ka jong ka kam.
U Myntri Rangbah ka jylla u la ban jur ba ka jingpynroi ïa ka roi ka par kaba kynthup lang, ka jingburom markylliang, bad ka jingïasam mar katjuh kan kyntiew ïa ka jingïatylli bad ka jingsngew ïatylli hapdeng baroh ki jaitbynriew ha ka Jylla.
Haba pynpaw ïa ki katto katne ki skhim jingïarap kiba la ai jingmyntoi ïa ki lak ngut ki briew, u la kdew ba la pynlong ïa ki jingthmu kum ka Go to Village, CMHT, bad kiwei kiwei ki prokram bapher bapher kiba pynshong nongrim ha ki nongshong shnong ban pynurlong ïa ka thong jong ka jingroi kaba ïaryngkat ha baroh ar kata ha ki jaka lum bad ki jaka them.
U la kdew ba ka jaka ïeng kali kaba bun mala ka dang shna ha Senapati, kaba long kaba nyngkong eh ha ka jylla.
Nalor kata, dang tei ïa ka jaka ïalehkai jong ki trai ri trai muluk ha ka jinglut kaba la antad kan long kumba T. 14 klur.
U la kyntu ïa ki paidbah ba kin ai ka jingïatreilang bad ka jingkyrshan na ka bynta ban pyndep ha ka por kaba biang ïa ki kam pynroi bapher bapher kiba dang ïaid ha ka distrik.
