
Nongpoh, K’lyngkot 13
Ka All Meghalaya Kick-Boxing Association (AMKA) ha ka Lah Sngi U Blei ka la plie paidbah ïa ka prokram ai jinghikai ba hynriew sngi lynter ïa kaba la tip kum ka 8th State Level Kick-Boxing Training Camp ha Umsning kaba la sdang naduh mynta ka sngi bad kut haduh ka 18 tarik mynta u bnai.
Ïa kane ka prokram ai jinghikai kaba la long ha AMKA Umsning Training Center, la ïadon lang da u Bah Eddie G. Kharbani, kyrtong MDC jong ka seng United Demo-cratic Party (UDP) na Umsning konstitwensi, kumjuh u Elias Marak, In-charge jong ka thanat Umsning, u Bah Samuel Hashah, President ka AMKA, lem bad kiwei kiwei.
Ha kane ka sngi plie, la sakhi ruh da ka jingdon ryngkat kumba palat 70 ngut ki khun samla bad ki hep barit na kylleng ki district ka ri lum Khasi Jaiñtia ki ban wan shah hikai ïalade ban pyntbit ha ka jingïalehkai Kick-Boxing ha kine hynriew sngi lynter.
Na ka liang ka AMKA ka la pynkup burom ïa ki samla bad ki hep barit kiba la dep ban wan ïashim bynta bad khur takma bapher-bapher ha ka jingïakhun kaba dang shu dep ha kine ki khyndiat taïew ba la dep na ka jylla Kerala.
Haba kren ha kane ka sngi, u Bah Eddie kum u kongsan u la kyntu ruh ïa ki khynnah bad ki hep barit ba kin long kiba don akor don burom bad ban minot thop ha kane ka sap kaba ki don, kumba ka kam ïalehkai mynta, lada shimkhia bad minot thop bad poi sha ka thong, ka dei ka lad ruh ban kamai kajih bad pynbit pynbiang ïa ka ïing ka sem, ym kumba long ha ki por mynshwa ba ka jingïalehkai bunsien ka dei tang ka kam kilanmet.
Kumba kiba bun na kine ki khun samla bad ki hep barit hapoh ka jingïalam jong u Bah Samuel Hashah kum u nongïalam, ki dei ruh kiba la wan ban ïashim bynta na kylleng ka ri bad ïoh ban khur ruh ïa ka nam jop ha ki kyrdan bapher bapher, kaba long pat ka burom kaba khraw ym tang ïa ka ïing ka sem, hynrei ïa ka shnong ka thaw, ka thaiñ bad ka jylla hi baroh kawei.
Nalor nangta, u Bah Kharbani u la ong ruh ba ka jingshim bynta ha kum kine ki lympung ka pynlong ïa ki khun samla bad ki hep barit ym tang ba kin ïoh ïa ka met kaba shait-khlaiñ, hynrei ba kin ïoh ruh ïa ka bor pyrkhat kaba khuid, khamtam ban lait na ki jingdih basniew kum u drok, uba la sdang ban kynrei bad ktah jur ïa kiba bun ki longïing-longsem.