Sydney, K’lyngkot:
Ki bor pyniaid ka Sydney ha kane ka por ki la khang noh shipor ia baroh 9 tylli ki rud-nong jong katei ka ri hadien ka jinglap ia 2 tylli ki lyngkhot tiar pyllun kum ka bol ba lieh bad rong byrthup ba la lap na rud duriaw ha ki bnai ba la leit.
Ka Northern Beaches Council ka la iathuh ba ka dang ialeh ban weng noh ia kitei lyngkhot maw ba la shem na kitei ki rud-nong bad kiba don ruh ia ka jingheh kat ki marbul bad don pat kiba kham heh.
Namar la ong ba ki rud-nong jong ka Sydney kiba la paw nam bha halor ka jingkhuid bad phyrnai khlir-khlir ka um, ki dei ruh ki jaka jngoh kai ba ju khring ia ki nongshang kai pyrthei na kylleng ka pyrthei.
Hynrei, ha kane ka por ki bor pyniaid ka Sydney ki la maham ia ki nongleit shang kai pyrthei ba kin kiar na kaba leit sha kitei ki rud-nong kiba kynthup ia ka Manly, Dee Why, Long Reef, Queenscliff, Freshwater, North & South Curl Curl, North Styene bad ka North Narrabeen tad haduh ban da ioh ia ka jingpynbna kaba thymmai na ki bor pyniaid ba ka la long kaba shngaiñ ban leit sha kitei ki jaka rud-nong.
Ki bor pyniaid ki la pyntip ruh ba ki dang iatrei lang bad ki tnat ba dei khmih ban ioh shim noh ia kitei maw rit kiba pyllun bad ban ioh phah wad bniah ia ka jinglong- jingman lane ka jingktah jong ki ia ka um lane ia ki briew kiba leit tur sha kitei ki jaka ba ki don.
Ha u Risaw jong u snem ba la dep, katto katne ki rud-nong kiba kynthup ia ka rud-nong Bondi jong ka Syndey, ki la shah khang noh hadien ba da ki hajar tylli ki maw pyllun ba rong iong ki la paw pyrthei harud jong kitei ki rud-nong ha kitei ki por.
Hynrei, hadien la shem ba kitei ki maw pyllun ki dei kiba la wan mih bad kylla dur na ki ‘acid’, ki kynja dawai bad kiwei de ki jait dawai pynkhuid bad kumjuh ruh na ki shñiuh bad ki jaboh- jabaiñ ba la pyntuid sha katei ka um.
