Shillong, K’lyngkot 14
U kyrtong ka Congress ban ïakhun ilekshon MDC sha KHADC na ka Jaïaw-Mawprem Konstitwensi, Bah Gerald Shullai, u la ong ba lyngba ka jingmih noh jong ki nongïalam ba hakhmat ka Congress ha u snem ba la lah, kam don jingktah satia ïa ka Congress namar ki phet tang ki nongïalam katba ki paidbah nongkyrshan pat ki dang don beit ha syndah jong ka seng.
Kum ban shu kdew hangne ba ha u snem ba la dep, 3 ngut ki MLA ka Congress kiba kynthup ïa u Bah Charles Marngar, MLA ka Mawhati, u Bah Gabriel Wahlang, MLA ka Nongstoiñ bad u Dr. Celestine Lyngdoh, MLA ka Umsning ki la mih noh na ka Congress ban leit pynïasoh sha ka NPP.
Ha shwa kane ruh, ka Congress ka la mad ïa kum kane kajuh jingeh ha ka samoi ba hapdeng u snem 2018-23 ha kaba ki la don 17 ngut ki MLA hapoh ka jingïalam jong u Myntri Rangbah barim u Dr. Mukul Sangma, ki la phet noh na ka seng ha u snem 2021.
U Bah Gerald u la ong ba ka daw ka jingphet noh jong ki nongïalam ka Congress hapoh ka Jylla ka dei namar ka jingbym don shuh jong ka seng ha ka bor ban bat ïa u lakam synshar hapoh ka Sorkar Pdeng.
“Ngi kiba don mynta bad ka Congress kum ma nga, ka dei namar ba nga ïohi ba ka dei tang lyngba ka Congress ka ban long ka lynti kaba sa shisien pat ba ngi hap ban trei na ka bynta ka jingbha ka imlang-sahlang khamtam ïa ka Jylla ka jong ngi, namar ka dei ka Congress kaba la pynwandur bad saiñdur ïa ka Ri India bad ïa ka Jylla jong ngi ruh”, ong u Bah Gerald.
U la ong ba ka dei tang lyngba ka Congress kaba lah ban ïarap bad ïada ïa ki paidbah ka Jylla khamtam ha kine ki sngi kiba mynta, la sakhi ba ki don ki seng saiñ hima kiba pyrshang ban khanglad ïa ka rukom bam bad ka rukom mane blei ki paidbah hapoh kane ka Jylla.
Haba kylli haduh katno u sngew skhem ba ka Congress kan ïoh jingjop ban ïoh thaw EC ha KHADC bad JHADC, u Bah Gerald u la ong ba ka rai hi baroh ka shong ha u paidbah ban pynjop ïa bun ki kyrtong na ka Congress ha kane ka ilekshon ka ban sa long shen.
“Ka shong ha ka rai u paidbah ba ïano un ai kham bun ka jingjop hynrei katkum ka jinglong-jingman kaba mynta, ki paidbah ki la dei ban sngewthuh kham bha ban ai bad pynjop kham bun tang ïa kawei ka seng namar da ka jingjop kham bun jong kawei ka seng, kan pyni la ka lah ne em ban trei”, bynrap u Bah Gerald.
