Ka ilekshon ban jied ïa ki nongmihkhmat sha ka ïingdorbar thawaiñ jong ka Khasi Hills Autonomous District Council bad Jaiñtia Hills Autonomous District Council kam jngai shuh bad katba nangïaid ki sngi, la sdang ban ïohi ruh ba ka lyer ilekshon ka la sdang ban beh hajan man la ki konstitwensi. Ngi ïohi ruh ba ka la sdang ban don wat ka jingïakob ban ïatai nia para marwei hapdeng ki Nongïalam halor ki kam pynroi ba ki la wanrah hapoh ki shnong ki thaw ban ïoh pynshai bad pyntip sha u paidbah ba aïu ki la lah ban leh ha ka jinglong nongmihkhmat ka jong ki.
Dang ha ka Lah Sngi U Blei, u MDC ba mynta ka Nongkrem u Bah Lambor Malngiang u la kob ïa u Bah Ardent M Basaiawmoit, uba dei u MLA ba mynta ka Nongkrem ban ïatainia para marwei halor ki kam pynroi ba mano napdeng jong ki, ki la wanrah hapoh ka konstitwensi hi baroh kawei khamtam ha kaba ïadei bad ki surok syngkien. Kane ka jingkob jong u Bah Lambor ïa u Bah Ardent ban ïatainia halor ki kam pynroi la sngewthuh ba kan long shisha kaba i bang bha ban peit bad sngap, bad kane baroh kan shong satang lada u Bah Ardent un kloi ban pdiang ïa kane ka jingkob jong une u MDC ka Nongkrem.
Kumba ka ju long hi, haba la jan ki ilekshon, ki ju mih shibun ki jingpynpaw bad jingpynshai paidbah ne ban pyntip ne wanrah ka kaiphod hakhmat u paidbah da ki nongmihkhmat ïa ki kam ne ki kam pynroi kaba ki la wanrah hapoh ki shnong ki thaw na ka bynta ban pynbit pynbiang ïa ka konstitwensi kaba ki mihkhmat. Ngi la ju ïohi ba ha ki por bad ki snem ba la leit, u Bah Ardent u ju mih shakhmat ban kob ïatainia bad kiwei ki Nongïalam hynrei kane kan dei pat ka sien ba nyngkong ba kin don kiba kob ïatainia bad u Bah Ardent. Ki paidbah ki da thrang dik-dik ïa kane ba kan urlong ban sakhi bad sngap da la ki jong ki shkor mano ba la trei borbah shisha na ka bynta ka konstitwensi, namar baroh ar ngut kine ki nongmihkhmat ki la pynksan ïalade.
Haba phai sha kane ka jingïakob, lah ban ong ba ka jingdon ïa u MLA bad MDC na ki seng saiñpyrthei bapher-bapher ban mihkhmat ïa kajuh ka konstitwensi, imat ka don ka jingmyntoi namar hangne ka paw ba ka don ka jingïaleh bad ïakhun ban wanrah ïa ki kam pynroi bad ym don satia ka por ban ïaleh sting ne leh klet. Lada dei ba don ki nongmihkhmat ne ki MLA bad MDC na kajuh ka seng ban mihkhmat ïa ka konstitwensi, imat ka lah ban pynsting noh shiliang ne ban pynkham pynsuk shiliang namar la sngewthuh ba kan nym don ka jingïakob ne ka jingïapyni bor ne kdew kti ïa ki kam ne ki jingtrei. Kumta mynta ka shong pat ha u paidbah nongjied ban ai ïa la ka rai kano kaba ki sngew biang bad kano kaba ki sngew ba ka dei ban long.
Kumta kaba donkam ha kane ka khep ba mynta ka long ba ai ba ki jingïatai kin long beit ki jingïatai halor ki kam bad lyngba ki jingpynshisha ba ki la trei ïa kita ki kam hynrei ym ban ïa peit ‘matdong shiliang ne wanrah ka jingïashun bad kum ki nongkyrshan jong baroh arliang ban long beit kiba ïa biang lang, namar ka ilekshon ka wan shisien ha ka san snem, katba ha kiwei pat ki sngi ngin hap ban ïa im lang shong lang ha kajuh ka shnong ka thaw kum shi ïing shi sem. Ai ba ki jingïatai kin kut ha ki jingïatai, ka jingïabha pat kam dei ban duh hynrei ban ïai don lang ha iwei-pa-iwei khnang ba ngin long ki nongshong shnong kiba shong ha ka suk ka saiñ, kaba ïa ieit iwei-ïa-iwei bad ban burom markylliang khlem da thew ne kdew kti ïano-ïano ruh.
