Shillong, K’lyngkot 14
Ka Congress ha ka Sngi Ba-ar ka la pynbna sa ïa ka kyrteng jong lai ngut ki kyrtong ki ban ïakhun ïa ka ilekshon MDC sha ïingdorbar jong ka Jaiñtia Hills Autonomous District Council (JHADC).
Ïa ka kyrteng jong kine lai ngut ki kyrtong la pynbna da ka General Secretary ka MPCC ka Kong Wansuk Syiem. Ki lai tylli ki kyrteng kiba la pyllait paidbah ki long u Bah Pynbiangmi Laloo ban ïakhun na ka 17-Mowkaiaw konstitwensi, u Bah Brosent Siangshai na ka 22-Musiang-Rangad bad u Bah Bashan Tangliang na 26-Sumer konstitwensi.
Katkum ka jingtip ba la ïoh lum la ong ba na ka liang jong ka Congress mynta ka dang pynkhreh shaid shaid ban pynïeng kyrtong na baroh 29 tylli ki konstitwensi hapoh jong ka JHADC bad ka jingïakren bad kiba tyrwa ban ïakhun ïa ka MDC ka dang ïaid bad ynda la biang lut baroh, yn sa pynbna biang ïa ka kyrteng jong ki kyrtong kiba dang sah.
