Shillong, K’lyngkot 15
U Vice-Chancellor ka NEHU, Prof. Prabha Shankar Shukla sa shisien u la pynjlan biang ïa ka jingshim shuti jong u (earned leave) haduh ka 19 tarik u Kyllalyngkot, 2025.
Ha ka ’email’ jong u kaba la phah sha u Registrar, u VC u la pan ban pynjlan por, ha kaba la thoh, “Kum ka jingbteng jong ka ’email’ jong nga kaba la thoh ha ka 1 tarik Nohprah, 2024 ha kaba ïadei bad ka jingshim shuti (earned leave), nga kyrpad ban pynjlan ïa kane kajuh naduh ka 13tarik haduh ka 17 tarik Kyllalyngkot (with suffix 18 & 19 Kyllalyngkot) namar kijuh ki jingjia.”
Da kaba kdew ïa ki “juh ki jinglong-jingman” na ka bynta ka jingbym don jong u ha NEHU, u VC, ha ka ’email’ ba la phah sha u Registrar ka skulbah, u la kyrpad na bynta ka jingpynjlan ïa ka shuti jong u kum ka jingbteng ïa ka ’email’ kaba u la phah ha ka 1 tarik u Nohprah, 2024.
Ha ka ’email’, u Prof. Shukla u la kdew ba lada jia ba don kano-kano ka kam kyrkieh ha ka liang ka jingpule ne jingpynïaid kam, u Registrar u lah ban kynjoh sha u lyngba ka ‘phone’ ne ‘online’/’email’.
U Prof. Shukla u la kdew ruh ba u Professor uba rangbah tam ha ka kam, ne Pro Vice-Chancellor un khmih ïa ki kam ba na ka por sha ka por jong ka skulbah ha ka jingbym don jong u.
Kum ban shu kdew hangne ba ka shuti pynjlan jong u VC ka NEHU ka la kut noh ha ka 12 tarik u Kyllalyngkot mynta u snem.
Kane ka dei ruh ka sien ba saw ba u VC u la pynjlan ïa ka jingshim shuti jong u.
Kum ban shu kdew hangne, u VC u la don hapdeng ka jingshim shuti hadien ka jingïakhih na ka liang ki samla pule ha ryngkat ka jingkyrshan ki nonghikai bad nongtrei ka skulbah halor ki jingkynnoh pynïaid kam bakla jong u ha u Naiwieng jong u snem ba la dep.
Shuh shuh ki samla pule ki la pynlong ïa ka jingïakhih shah thngan ba khlem buh por kaba la neh jan lai taïew kynthih.
