Shillong, K’lyngkot 15
Ka Slog Warriors bad ka Rising CC ki la ïoh jingjop ha ka lympung ïalehkai Third Division Cricket League 2024-25 ba la pynïaid da ka Shillong Cricket Association ha ka Sngi Balang ha madan Urkaliar, Shillong.
Ha ka jingïakhun kaba nyngkong, ka Slog Warriors ka la pynliem noh ïa ka Youngstar CC da 5 wiket. Ka Slog Warriors kaba la jop ïa ka kynting pisa, ka la ailad shwa ïa ka Youngstar ban tied nyngkong ha kaba ka la ïoh 101 run bad shah pynhap 10 wiket ha ki 17.2 over. U Md Wahid u la khyrwit ïa ka shiteng spah kaba 52 run na ki 32 bol. Katba u Sonu Prasad u la shim 4 wiket bad 2 wiket la shim da u Manivannan na ka bynta ka Slog Warriors.
Haba wan shimti ïa ka pali ba ar, ka Slog Warriors ka la kynjoh sha ka thong hadien ba ka la ïoh 102 run bad shah pynhap 5 wiket ha ki 12.5 over. U Biswajit Das u la tied 32 run na ki 21 bol bad u Imroz u la ïoh 26 run na ki 27 bol. Katba u Rajdeep Barua u la shim 2 wiket na ka bynta ka Youngstar. Ïa ka nam ‘Player of the Match’ la ïohpdiang da u Sonu Prasad.
Haba phai sha kawei pat ka jingïakhun ba ar, ka Rising ka la pynliem noh ïa ka United Brothers da 3 wiket. Ka United Brothers ka la shimti ban tied nyngkong ha kaba ka la ïoh 76 run bad shah pynhap 10 wiket ha ki 13.5 over. U Ravishankar kr Yadav u la tied 28 run na ki 15 bol bad u Rohit kr Singh u la ïoh 11 run na ki 9 bol. Katba u Shankar Thakuri u la shim 3 wiket bad 2 wiket la shim da u Bikash Lama na ka bynta ka Rising.
Haba wan shimti ïa ka pali ba ar, ka Rising ka la lah ban kynjoh sha ka thong hadien ba ka la ïoh 77 run bad shah pynhap 7 wiket ha ki 11.1 over. U Shankar Thakuri u la tied 28 run na ki 20 bol bad u Rahul Sharma u la ïoh 33 run na ki 22 bol. Katba u Rupon Talukdar u la shim 5 wiket na ka bynta ka United Brothers. Ïa ka nam ‘Player of the Match’ la ïohpdiang da u Shankar Thakuri.
