Doha, K’lyngkot:
Ka kynhun lehnoh jong ka Palestine, ka Hamas ha ka Sngi Balang ka la pdiang ia ka jingiakren bad ka jingiasoi ban sangeh iasiat noh bad ka Israel hapoh ka nongbah Gaza, da kaba kular ruh ban ia pyllait noh ia ki briew jong ka Hamas bad ka Israel markylliang. Namar la ong naduh ba khie ka thma ha u Risaw 2023, ka Hamas kam shym la treh ban iasuk bad ka Israel bad kam treh ruh ban pyllait ia ki briew jong ka Israel wat la ka la ioh ban iakren man ka por haba iadei bad ka jingiapyllait briew bad ka Israel. Wat la katta, la ong ba ka jingiakren pynbeit ha kane ka sien, ka la nang jan ban poi sha kaba kut syndon ia ka thma hadien ka jingiakren kaba la long ha Qatar ha ka Sngi Balang. Katkum ka khubor na ka US bad ki heh nongialam ka Qatar, la ong ba ka Israel bad ka Hamas ki la jan poi sha ka lad jingiasuk bad ka thma hapdeng jong ki kan sa kut noh ruh shen ynda ki heh ka Hamas bad ka Israel kin ioh ban soi noh ia ka jingiateh soskular ban sangeh iasiat bad ban ia klet noh ia ki jingiakynad kiba la mih ha kane ka sien.
Ka America, Egypt bad Qatar ki la don bynta ban pynkut noh ïa ka jingïateh kular ban sangeh thma hapdeng ka Israel bad ka Hamas naduh u snem ba la dep bad ban pynthikna ban pyllait ïa ki nongshah kem ha ka por ba ka Hamas ka la hiar thma ïa ka Israel ha ka 7 tarik u Risaw jong u snem 2023 kaba la sdang ïa ka jinghiar thma. Ki nongïakren ki la ïakynduh ha Qatar ha ka sngi Balang da kaba kyrmen ban ïoh ïa ki jingtip ba khatduh.
U nongaiktien jong ka tnad kam bar ri jong ka Qatar, u Majed Al-Ansari, kham mynshwa, u la ong ha ka jingialang bad ki nongthoh khubor ba la ai ia baroh arliang ia ka jingthoh bad ka jingiakren halor ki jingtip ba khatduh ka dang iaid shakhmat.
Ha kane ka Sngi Ba-ar, u Myntri kam bar ri jong ka US, u Antony Blinken, u la ong ruh ba ka jingiateh kular ban sangeh iasiat hapdeng ka Israel bad ka Hamas ka la don ha ka jingma.
