Nongstoiñ, K’lyngkot 15
Katto-katno ki briew ki la mih kynsan ban rah ïa ki lama ïong bad placard hapdeng ka jingïalang jong ka Voice of the People Party (VPP) kaba la pynlong ha ïew Nongstoiñ ha ka 15 tarik mynta u bnai ban pynithuh ïa u kyrtong ka seng ban ïakhun na Nongstoiñ Konstitwensi.
Ka jingmih jong kitei ki briew ban rah ïa ki lama ïong bad ki placard ka la jia ha ka por katba u President ka VPP u Bah Ardent Miller Basaiawmoit u dang ai jingkren ban pynshai paidbah ïa ki mat bad ki nongrim ka seng bad kumjuh halor ka jingpynduh tiket MDC ïa u Bah Marbiang Nongsiej.
Shuh shuh, la ïoh ban sakhi ba ha kitei ki placard ba la rah da kitei ki briew hapdeng kiba bun ki paidbah la don ruh ki jingthoh pynrem kum ka kyntien kaba ong ‘VPP wat pynjem rngiew ïa ki paidbah ka Nongstoiñ’, ‘Ardent sa katno sien phin pharia ïa ki paidbah Nongstoiñ’ bad kiwei kiwei de ki jingkynthoh.
Mar kumta tang hadien katto-katne minit kitei ki nongrah placard bad lama ïong ki la mih noh na katei ka jaka. Ha katei ka por u Bah Ardent u la ong ïa kitei ki samla ban ïeng shwa hangto ban kham itynnad bad u la ong ruh ba ïoh lehse ka dei ka jingshah ïalam bakla ka jong ki.
Ki katto katne ngut kiba don ha katei ka kynhun rah lama ïong haba kren ha ki nongthoh khubor ki la ong, “Ngim shym la wan na kino-kino ki seng saiñpyrthei, ka jingwan ka jong ngi ka long na ka sur u paidbah napoh ka dong ka thaiñ. Balei haduh ban da poi u pud ban rah lama ïong? Ka daw ba ngi ïohi ïa ka jingkhein beiñ ïa ka Nongstoiñ Konstitwensi bad kheiñ poh ïa ki nong West hynrei ngin nym beiñ ïa ka VPP ïa kaba ma u, u seng”.
Shuh shuh, ki la ong ruh ba “Ngi la ïohi ruh ba hadien ba la dep ban pynbna ïa ka tiket hynrei u kheiñ ba ki nong West ba ki dang ïa dum, ha kaba la pynduh noh ïa ka tiket bad ai pat sha uwei pat. Na ka liang jong ngi, ngi sngew ba ka dei ka jingïuhroit bad ka jingleh beiñ, ngin nym kynthoh ïa ka seng namar la shai lehse lada u Bah Ardent u la ngiah u lah ban khylliap lama noh”.
Haba jubab pat balei ki la mih jyndat noh haba u Bah Ardent u la ong ap shuwa ap shuwa. Ki la ong ba kim kwah ban sngap ïa ka jingkren jong u Bah Ardent. Kumta ki la phet noh hadien ba ki la ïoh ka lad ban pyni kum ka dak ban pyrshah ïa u.
