Shillong, K’lyngkot 15
Ka Kynhun Myntri ka Jylla ha ka Sngi Balang ka la mynjur ïa ka Meghalaya School Service Rules, 2025.
Haba kren sha ki lad pathai khubor, u Myntri Rangbah ka Jylla, Conrad K. Sangma u la ong, “Ïa kane la leh namar ba ha ki ‘Service Rule’ ba la dep, ka don ka jingduna haba ïadei bad ka jingpynkiew kyrdan ïa ki nonghikai skul LP bad ki Asst. Teacher bad kin sa sahkut ha katto-katne ki kyrdan na bynta bun snem bad ki don khyndiat eh ki lad ban kiew kyrdan – kaba la pynmih khyndiat ka jingïakynad hapdeng ki bynta bapher-bapher ha ka tnad pule-puthi.”
Kumta, na ka liang u Sangma u la ong ba hadien ka jingïamir jingmut kaba jylliew bad ki seng bapher-bapher, ka tnad pule-puthi mynta ka sngi ka la wanrah jingkylla ha ki kyndon bad kane kan sa plie lynti na bynta ka sienjam babha ha ka liang ka jingpynkiew kyrdan haba phai sha ki nonghikai skul LP.
U Myntri Rangbah u la pyntip ruh ba ka Kynhun Myntri ka la mynjur ïa ka jingtyrwa ban thaw ïa ki kyndon jong ka Jylla (State Rules) ban pynbeit ïa ka jingsiew na ka bynta ka eksamin jong ki ‘case’ bapher-bapher ba ïadei bad ki jingpyninam, ki jingthoh artikle ha ka Directorate of Forensic Science hapoh ka tnad kam pohïing.
“Ïa kane la leh namar bunsien, da ka jingdon jong ngi ïa ka Forensic Lab katkum ka juk stad ba mynta, ngi ïohpdiang ïa ki jingkyrpad na ki ‘agency’ bapher-bapher, don katto-katne jong ka Sorkar, don jong ki ‘riew shimet bad kumjuh na kiwei-kiwei ki Jylla hynrei ngim don ïa ka rukom treikam ban pynïapher ïa kine ki jingkyrpad bad kumjuh ban buh-dor ïa ki katkum ki jingsiew kiba donkam,” u la ong.
U la bynrap “Ngi dang shu pynkhuid mynta ka sngi halor ka nongrim jong ka jingtyrwa kiba la wan ban don ki jingpynïapher na ka bynta ki ‘agency’ kata jong ka Sorkar Jylla. Ka don ka kyrdan ‘A’ (kaba kynthup ïa ka Sorkar Meghalaya), ‘B’ (kynthup ïa ki ‘agency’ ha Meghalaya hynrei ki bym hap hapoh ka jingpynïaid jong ka Sorkar Meghalaya), ‘C’ (kynthup ïa ki ‘agency’ ki bym hap hapoh u pud ne jingpynïaid jong ka Meghalaya) bad ‘D’ (kan kynthup ïa baroh ki ‘agency’ shimet).”
“Kane ka dei tang ka jingbteng bad ka jingpynbeit ryntih ïa ka jingtreikam baroh kawei jong ka ‘Forensic Science’ hapoh ka tnad kam pohïing,” la bynrap u Myntri Rangbah.
