Shillong, K’lyngkot 15
U Myntri Rangbah ka Jylla u Conrad K. Sangma u la pynsngew sha ka President ka Indian Olympic Association (IOA) ka P.T Usha ban ailad ïa ka Meghalaya ba kan pynlong ïa ka 39th National Games ha u snem 2027.
Ïa kane u la pynpaw ha ki lad pathai khubor hadien ka jingïalang bad ka P.T Usha lyngba ka video conference ha ka Sngi Balang ha ka jingïadon lang ki nongïalam ka Meghalaya State Olympic Associa -tion (MSOA) bad ki ophisar ka tnat ialehkai, ha kaba u la pynpaw ha ka, ba ka Jylla ka la long ba la khreh ban pynlong ïa katei ka lympung ïalehkai bah jong ka ri.
U Sangma u la ïathuh ba ha ka jingshisha ka Jylla ka la pyndep ïa baroh ki jingdonkam ha kaba ïadei bad ki kot ki sla ban phah sha ka IOA naduh u snem 2018, hynrei na ka daw ka jingwan ka khlam Covid-19 bad kumjuh ka jingbym lah ban pynlong kiwei ki jylla ha ka por kaba biang ïa ka National Games, te kumta kane ka jingthmu ka la sah teng.
Shuh shuh, u Myntri Rangbah u la ïathuh ba ha kine ki saw snem ka Jylla ka la pyrshang ban pynbha ïa ki jaka ïalehkai bad ban tei ïa ki kam pynroi na ka bynta ki jingïalehkai bapher-bapher kynthup ka jingpynbha bad pynbiang ïa ka Jawaharlal Nehru Sports Complex ha Shillong, ka Wahïajer Stadium ha West Jaiñtia Hills bad ka P.A. Sangma Integrated Sports Complex ba Tura bad kiwei-kiwei ki jaka ïalehkai.
U la pyntip ruh ba ka Shillong ka la ïoh ban pynlong ïa ka North East Games ha u snem 2022, ka South Asian Games ha u snem 2016 bad ha kine ki lai snem ki la ïoh ban pynlong man ka snem ïa ka Meghalaya Games.
“Kumba ka long mynta ki don katto-katne ki jylla kiba la buh ka jingtyrwa ban pynlong ïa ka National Games bad kumjuh ka Meghalaya ka la thrang ban ïoh pynlong ha u snem 2027, te kumta na ka liang ka IOA kan hap ban ïaid kat kum ki rukom pynïaid.”
U la ïathuh ba na ka liang katei ka President ka IOA, ka la kyntu ïa ka Meghalaya ba kan pynsngew ruh sha ka tnat ïalehkai jong ka Sorkar Pdeng khnang ban pynurlong halor kane ka jingthmu.
Kumba ka long mynta ka Uttarakhand kan pynlong ïa ka 38th National Games mynta u snem ka ban sdang naduh 28 tarik mynta u bnai haduh 14 tarik u Rymphang ha kaba u Myntri Rangbahduh ka ri u Narendra Modi un plie pyrda ïa ka bad yn wan shim bynta kumba shiphew hajar ngut ki nongïalehkai ha 38 tylli ki jait jingïalehkai.
