Jowai, K’lyngkot 15
Ka Amkoi SC na ka Upper Division bad Shkenpyrsit na ka Lower Division ki la jam sha ka semi final jong ka lympung ïalehkai Amlarem Football League ba la pynïaid da ka Amlarem Sub Division Sports Association (ASSA).
Kane ka wan hadien ba ki la ïoh jingjop ha ka jingïalehkai quarter final kaba la long ha ka Sngi Balang ha Mini Stadium Ladjaplem.
Haba phai sha ka jingïalehkai Upper Division, ka Amkoi SC ka la pynliem noh ïa ka Khlachympa da 1-0 kol bad ïa kane ka kol la thep da u Lovis Pohtam.
Ha ka Lower Division, ka Shkenpyrsit ka la lah ban pynliem noh ïa ka Lumpyngngad SC lyngba ka tie-breaker da 4-3 kol hadien ba ka jingïalehkai ha ka por ba la buh ka la kut da ka jingïakhaid mar 1-1 kol. Na ka bynta ka Shkenpyrsit SC la thep da u Wanmi Sana (21) bad ïa ka Lumpyngngad SC la thep da u Tylli Pohshna.
Ka jingïalehkai quarter final ha ka Sngi Palei ha ka Lower Division kan long hapdeng ka Padu United pyrshah ïa ka Nongshilliang Pdengshakap ha ka por 12 baje mynsngi. Katba ha ka Upper Division kan long hapdeng ka Sohlawiat SCC pyrshah ïa ka Amlanai TC ha ka por 2 baje nohphai sngi.
